French Open atan Nadal la chiang lo cheu!

Hliamin a bawhbehna atanga thochhuakin French Open inbuatsaihna warm-up tournament Italian Open khelh mekahte inlan chho leh thei tawh mah se May ni 26 atanga Roland Garros, Paris-a khelh tan tur clay-court grand slam tournament-ah hian Rafael Nadal a tel ngei dawn em tih a la chiang thei lo!
Karliamta Inrinni khan Italian Open second round match pakhatah straight sets hmanga Poland mi Hubert Hurkacz hneh loin Spaniard a tlawm leh rih a, inkhelh banah French Open khelh leh khelh loh chungchanga a rilru a la phir zel rih thu a sawi.
Mallorca khaw tuiliak chuan, “Vawiin khan court chhunga chet ka la harsatzia in hmu thei ang a, ka han tarlan duh chu ka la inpeihchhuak lo hle a, ka khel tha lo tih hi a ni.
“Roland Garros-a inlan turin thutlukna ka la siam mai thei lo a, chawlhkar hnih la awmah hian theitawp chu ka han chhuah chhunzawm zel ang.
“Taksa lamah harsatna tawk ngei mah ila ka tennis career-a tournament pawimawhber hawisan tur em chuan chhuanlam ka la siam phal lo,” a ti.
Karliamta Ningani khan Italian Open bul a tannaah set thum khelin Zizou Bergs a hneh zet a, Inrinni zanah erawh minute 93 chhungin big-serving Pole chuan 6-1 6-3-in a hnawtchhuak a, kumin bak tennis inelna hmachhawn zui theih a inbeisei tawh loh thu a lo sawichhuah tawh avangin Italian Open title vawi 11 lak tlin a tumna chu a thamral hlen dawn ta niin a lang.
Kum 37 Spaniard hian tun season kal lai tawp ruala tennis inelna chawlhsan a tum thu a lo sawi tawh a; nikum kum tluan tih theih tur kha khel bawr hliamin a tibuai a, zai hial a ngai a; kumin January thlaah khelmual a rawn rap leh thei zawk a, Brisbane-ah tihrawl hliamin a tlakbuak zui leh a! Tunah inkhel thei sawih sawihin awm mah se a career-a a hnuhnungber ni tawh tura beisei French Open-ah a inlan thei dawn em tih chu amah ngei pawhin a la sawichiang thei lo.
Tarlan tawh thin angin, Nadal hi record siama French Open title 14 la tling thei awmchhun niin, a career-ah belhkhawmin grand slam title 22 a khawl tling tawh bawk.
Rome khaw tournament kal mek Italian Open Inrinni inkhel dangah Great Britain player kum 28 mi Cameron Norrie chuan Spniard Jaume Munar laka 6-3 1-6 6-3 hnehna changin Stefanos Tsitsipas nen an intum zui leh dawn a ni.
British number two Jack Draper erawh round sang zawka a chipui Norrie zuilut thei lo zawngin defending champion Daniil Medvedev chuan 7-5 6-4-in a hnawtchhuak a, Russian Medvedev hian last 32 inkhel pakhatah qualifier Hamad Medjedovic a hmachhawn zui leh ang.
Hmeichhe lamah Polish world number one Iga Swiatek chuan women’s last 16 lut turin Yulia Putintseva lakah 6-3 6-4 hnehna a chang a, straight-set hmanga Aliaksandra Sasnovich vawtlatu Angelique Kerber nen quarter-final luh an inchuh dawn a ni.
Japanese world number three hlui Naomi Osaka pawhin tournament kal laiah set a la hloh lo chhunzawm zel a, 6-3 6-3-a Daria Kasatkina hneh chungin last 16 a lut a, Qinwen Zheng nen last eight luh inchuh match pakhatah an intawng ang.
American kum 20 mi Coco Gauff pawh round sang zawk lut zingah a tel a, Spain nula Paula Badosa hmachhawn thei tura Romanian world number 68 Jaqueline Cristian nen an inbeihnaah US Open champion Gauff hian Rome khaw khelmualah harsatna a tawk laih hman a, chiang zeta set khatna a lak hnuah a aia chiangin set hnihna a hloh zui leh a, darkar hnih zet chhungin 6-1 0-6 6-3-hnehna a sualchhuak zui ta tho a ni.