Game zone kangah mi 28-in nunna chân

Rajkot-a gaming zone a kangmei nasa tak chhuak avangin mi 28-in nunna an chan a, heng zinga 9 chu naupang niin he facility him lo lutuk avanga zawhna a nasa hle. Officials te chuan amusement centre chuan fire clearance no-objection certificate (NOC) a nei lo va, emergency exit pawh pakhat chauh a nei an ti.
He gaming zone, TRP tih hian weekend discount siamin ticket Rs 99 chauh a tih avangin tlawhtu a ngah hle a. Kangmei hi short circuit atanga chhuak nia ngaih niin mahse official te chuan chhuichian a nih hma chuan an sawi chiang thei lo an ti thung.
Gaming zone chuan license a nei lo va, Rajkot Municipal Corporation atangin fire clearance No Objection Certificate a nei lo an ti bawk a. He chhiatna thlen hnu hian regulatory compliance lam nasa zawka ngaihtuah zui a ni.
Rajkot Mayor Nayna Pendhadiya chuan, “Hetianga game zine lianin fire NOC a nei lo hi kan chhuichaing dawn a, a nghawng chu kan hmuh mek hi a ni. He issue ah hian politics a inrawlh kan remti dawn lo,” tiin a sawi.
Facility chuan emergency exit pakhat chauh neiin kangmei chhuah hnuah buai nuai nuaina a thleng zui bawk a. “A luhna a temporary structure a tlukchhiat hnuah a chhunga awm te tan pawna tlanchhuah a harsa em em a ni” tiin Rajkot fire officer Ilesh Kher chuan a sawi a.
TRP game zone neitu leh manager te chu manin an awm nghal bawk. He thil thlen hnu hian state director general of police chuan Gujarat hmun tina game zone te chu a him leh him loh enfiah vek turin thupek a chhuah nghal bawk a. Dan kalha chete chu man turin a ti nghal bawk.