US-in inkahhai a rawtna duh lo bur

Far-right Israeli minister pahnih te chuan kar kalta Zirtawpnia US President Joe Biden an inkahhai rawtna siam chu Prime Minister Benjamin Netanyahu an a pawm a nih chaun a sorkar atanga an ban tur thu an sawi.
Finance Minister Bezalel Smotrich leh National Security Minister Itamar Ben-Gvir te chuan Hamas te nuaichimih an nih hma chuan eng imnamah siam an duh lo tiin an sawi.
Mahse Opposition leader Yair Lapid thung chuan Netanyahu an inkahhai rawtna a pawm a nih chuan an thlawp tur thu a sawi thung.
Prime minister Netanyahu chuan Hamas military leh an inrelbawlna hrang hrang te nuaichimih vek a nih hma chuan inkahhaina a awm lovang a lo titawh thung a.
Mahse US President Biden chuan rawtna a siamah kar ruk chung inkahhai siam ni se chutih chhung chuan Israel Defense Forces (IDF) te chu Gaza a mihring chenna atangin inhnukdawk se, Israel mi Hamas tena an hren te pawh chhuah zalen ni se, inbakaihna hrang hrang titawp zuiin Gaza dinthar lehna kalpui ni bawk se tih a ni.
Joe Biden rawtna hi a duh loh thu sawiin Smotrich chuan Hamas nuaichimih an nih vek hma leh mitang hren te chhuah zalen an nih vek hmaa inremna siam tu sorkar ah a tel dawn loh thu a sawi nghal thung.
Ben-Gvir pawhin ‘inkahhai kan remti chuan indona a tawp tihna a ni a, Hamas te nuaichimih thil tum kan neih chu an kalsan dawn tihna a ni. He rawtna hi terrorism tana hnehna niin State of Israel security atana pawi a ni’ tiin a sawi a. US rawtna pawm ai chuan ‘sorkar tlukchhiat tir’ a tum zawk thu a sawi bawk.
Netanyahu right-wing coalition chuan parliament ah majority an nei chang chang chauh a, an thawhpui Ben-Gvir a Otzma Yehudit (Jewish Power party te hian seat ruk lai neiin Smotrich a Religious Zionism party ten seat sartih an nei bawk a, chung party te thawhpoui avanga Netanyahu chu sorkar thei mai mai a ni bawk.
Mahse Yair Lapid, Israel a opposition politician lawk ber erawh chuan prime minister chu a thlawp tur thu sawi thungin a party Yesh Atid (There is a future) te chuan seat 24 an nei ve thung a.
Netanyahu hian US rawtna awma inkahhai a remtih avanga Ben-Gvir leh Smotrich tena a sorkar an chhuahsan chuan hostage deal a awm theih nan kan thlawp ang tiin a sawi.
Hetihlai hian Tel Aviv khawpuiah chuan Israeli sorkar chu Biden rawtna pawm tura nawrna neiin mi sang tam takin kawngzawhna an nei a. Mitam tak te chuan Netanyahu chu bang turin an nawr bawk.
Lungawilohna lantirtu te leh police te inkarah buaina a chhuak bawk a, mithenkhatte chua man in an awm phah bawk a ni. Tun hnaiah Tel Aviv ah lungawilohna lantirin a awm fo ca, mitang chhungte leh anti-government campaigner te chuan hostage deal a awm theih nan nawrna hrang hrang an kalpui tawh bawk a, chung zingah chuan Netanyahu chu bang se inthlan thatna awm se tih te pawh a tel.
Karkalta Inrinni khan Egypt, Qatar leh US te chuan Israel leh Hamas te chu Biden rawtna chu an pawm dawn leh dawn loh tichiang turin an ngen bawk a.
Officials te chuan Gaza a inkahhai a awm theih nan leh mitang te chuah an nih theih nana palai hna kan thawh meknaah Hamas leh Israel te chu President Joe Biden rawtna chu an pawm dawn leh dawhnloh tichiang turin kan ngen a ni tiin an sawi.
Senior Hamas politician chuan Israel in rawtna chu a pawm a nih chuan an pawm ve tur thu a lo sawi tawh thung a.
Mahse Biden an rawtna a siam hnuah Netanyahu office chuan Israel chuan indo a tawp theih nana tiamkamna a neih te chu sawhsawn a la ni lo a ti thung.
Israel tiamkamna neih chu Hamas military leh theihna tin te nuaichimih vek, mitang te chuhah zalen leh Gaza chu Israel tana hlauhawm ngai tawh lova siam te a ni a. Israel chuan heng a thil tum te tihhlawhtlin a nih hma chuan inkahhai awm a remti dawn lo a lo ti tawh a ni.
Hetihlai hian Rafah ah indona kalpui zui zel niin Israel chuan indo thlawhna hmangin Gaza southern city Egypt border hnaih chu a la bei zui reng tho bawk a.
Palestiian territory hmar lam Gaza City ah pawh inkahahna a thleng bawk a ni.
Gaza indona avang hian Palestine 36,000 chuangin nunna an chan tawh niin Hamas-run health ministry chuan a tarlang a.
Indona chu 7 October 2023 a Hamas silai keng ten Israel ram luta mi 1,200 an tihhlum leh mitang 252 an hruai atanga intan a ni.