Sawhthing tâm veng tha thawkhat
Kuthnathawktute sawhthing chin a tâm avanga Horticulture department-in a chhanchhuah beihpui ‘Operation Ginger 2024’ chu a hlawhtling thawkhat a, sawhthing tâm tur tam tak leh tâm zel tur venhim a ni tih sawi a ni.
Kumin August 16 atanga Horticulture department-in sawhthing tam beihpui an thlakna hi thlirletin Ningani khan Horticulture minister Prof Lalnilawma hoin department hotute an thukhawm a. District tina Operation Ginger neih chhunga department hmalaknaa sawhthing chingtute an puih dan an report a ni.
District tam berah hian an beihpui thlak hlawhtlinna hi zaa 80 chunglam a ni a. Sawhthing tam zel tur nasa taka vengin, kuthnathawktute tam tak tlakchhiat theihna dinhmun atangin an chhanchhuak dawn nia an ngaih thu sawi a ni.
Mizoram sawrkar flagship programme – Bana Kaih Scheme hnuaia kuthnathawktuten sawhthing an chin tan tirhin, kuthnathawktuten phur leh hmanhmawh takin sawhthing chi an lei a, a chi tha a nih leh nih loh emaw natna laka a chi a him theihna tura sanwgbawl emaw awm loin sawhthing ching an awm tih sawi a ni a. Kum dang zelah a nawlpuia sawhthing chin leh a nih dawn chuan fimkhur taka kalpui tawh nise, tih sawi a ni.
Khaw thenkhatah sawhthing a tam loh bakah khaw thenkhat chu kalpawh mai theih loh vangin khua zawng zawng tuamchhuah a ni lo.
Horticulture minister chuan Operation Ginger chu sum leh pai nei lo chung leh thawktu indaih lo chungin kalpui mah se, a hlawhtlinna an hmu nia sawiin, an hmalakna chuan thawktute thawhhona thatzia a lantir tih a sawi.
“Chief minister-in a ngaihpawimawh avangin sapthei chin uar thar leh a ngai a; Assembly Session neih leh turah Wine rule chu siamthat tum a ni a, chutah chuan sapthei wine chu hralh theih tura dan siam a nih beisei a ni,” Prof Lalnilawma hian a ti.
-- Advertisement --
8 Kuminah sawrkar hriatpui chinah Mizoram khaw 435-ah sawhthing chin a ni a. Operation Ginger kalpuinaah hian khaw 423 tuam a ni.
8 Sawhthing hi chhungkaw 24274-in an ching a, a tâm hian chhungkaw 8486 a nghawng.
8 Tun tum beihpuiah hian kuthnathawktu 6366 hnenah an hriat tur tul hrilh hman a ni.
8 Sawhthing tâm beihna kawnga an damdawi hman hlawhtlin dan hi zaa 70.45 nia chhut a ni.
8 A district angin Saitual district chu a nghawng na ber a, chhungkaw 4180 a nghawng.