Rohingya raltlante chenna kang nasa

Bangladesh thuneitute chuan Rohingya refugee camp-a kangmei chhuak avanga mi 12,000 chuang lai chenna nei lova siam phahna chu an chhui chiang mek.
He kangmei chhuakah hian nunna chan an awm hriat a ni lo va. Mahse, kangmei chuan chenna in siam chawp 2,000 chuang tichhe vekin choka-a gas cylinder kang atanga inkaichhawn nia ngaih a nih thu officials te chuan an sawi.
Police te chuan kangmei ch tihluih reng vang a ni em tih an chhui chiang mek a, mi pakhat an man tawh niin an sawi.
Bangladesh chhim-chhak lama Rohingya camp hi khawvela rufugee camp lian bera ngaih a ni a. Myanmar atanga raltlante awmkhawmna a ni.
Cox’s bazar a refugee camp ah hian raltlan tam tak te chu kangmeiin a kan bang thil hlu lakkhawm tur a la awm em tiin an pungkhawm hlawm a. Kangmei hi Pathanni tlai lama chhuak niin heng camp-te hi mau leh tarpauline hmanga sak mai te an nih avangin a kang duh hle a ni.
“Chenna In siam chawp 2,000 chuang kangral raihin mi 12,000 te chu tawmhulna nei lova siamin an awm mek” tiin Mijanur Rahman, Bangladesh’s refugee commissioner chuan a sawi.
Kangmei chhuak chu darkar thum chhunga thelhmih hman a ni chungin a kan chak em avangin tihchhiat a nei ngah hman a, chung zingah chuan mosque 35 mai bakah learning centre 21 te pawh tihchhiat zingah a tel.
Hrusikesh Harichandan, International Federation of Red Cross and Red Crescent Societies chuan kangmei chan camp a khawih chhiat nasat thu a sawi a.
“Ka chenna pawh kangral zingah a tel” tiin Mamun Johar kum 30 a upa Rohingya mi chuan a sawi a, “Kangmeiin engkim min kanralsak vek” tiin a sawi bawk.
Bangladesh-ah hian Rohingya refugee maktaduai khat chuang an awm a. Heng camp-te hi mihring awm thei tur chin aia tam vek awmna niin January 2021 leh December 2022 chhung khan kang mei tum 222 lai a chhuak hman tawh a, kangmei thenkhatte chu hal luih thiltih a nih thu Bangladesh defence ministry chuan thla kaltaa report an tihchhuahah an tarlang nghe nghe a ni.
March 2021 khan Rohingya camp-ah hian kangmei nasa tak chhuak tawhin mi 50,000 chuang tawm hulna nei lova siam niin mi 15 in nunna an chan phah a ni.
Rohingya te hi Muslim an ni a, Myanmar ram Buddhist tamna hmuna inbengbela awm reng niin kum tam tak chhung Myanmarese te tihduhdah tuar tawhte an ni a.
August 2021 khan Myanmar a Rohingya hel tena Myanmar military post te an beih hnuah Myanmar sipai ten chhan letna chetlakna an neih zui avangin Rohingya te chuan hlauin Bangladesh an pan khawm a ni.