Indian hmeichhe naupangten mipat hmeichhiatna hawi tharum tuar nasa

Indian hmeichhe naupangten mipat hmeichhiatna hawi tharum tuar nasa
India-a hmeichhia hmun thuma thena hmun khat dawn, 30.8% chuan kum 18 a tlin hmain mipat hmeichhiatna hawia an laka tharum thawhna an tuar a, khawvel pumah 18.9% a nih laiin India-ah hian a sang hle.
India dinhmun hi The Lancet-in khawvel puma sexual violence against children (SVAC) a zir chiannaah tar lan a ni.
Khawvel puma mipa pasariha pakhat zel (14.8%) leh India-ah mipa 13.5% chuangin puitling an nih hmain hetiang harsatna hi an tawk niin tar lan a ni bawk.
“Ram hrang hrangah kum 18 tlin hmaa hur sualna hawia tharum thawhna tuar zat hi a inang lo hle a. USA-ah chuan hmeichhia 27.5% leh mipa 16.1% a ni a. UK-ah chuan hmeichhia 24.4% leh mipa 16.5% a ni a, India-ah hian hmeichhia 30.8% leh mipa 13.5%-in an tuar a ni,” an ti.
Zir chiannaa SVAC an sawi fiahnaah hian kum 18 hnuai lamte mipat hmeichhiatna hmanpui leh tharuma inkhawih chin an telh a. Online-a inchhaihna an telh lo.
SVAC hi vantlang hriselna leh dikna chanvo humhalhna kawnga thil pawimawh taka ngaih a ni a. A tuartute hian depression, anxiety, rilru hrisel lohna, thawhah leh mipat hmeichhiat hman atanga inkai natna an neih sam phah bakah an hun kal zelah, zirna leh eibar dapna kawngah an nih tur ang an nih loh phahna a thlen nasa hle thin niin zir chiangtute chuan an sawi.
Khawvel puma SVAC rate hi a dik tak hriat theih a ni lo va, ram tam tak chuan an rama thil thleng an chhinchhiah that tawk loh avang leh hai lan lem loh a awm avangin thil nihna tak hriat a harsa niin an sawi.
The Lancet-in tun tuma a zirchianna hi kum 1990 leh 2023 inkara ram 204-a hetiang thleng chhinchhiah behchhan a ni.
“Zirna atang khan mipat hmeichhiatna kawnga hmeichhiaten tharum thawhna an tawrhna nasatna ram chu Asia chhim lam ramte an ni hlawm a. Bangladesh-ah 9.3% a nih laiin India-ah chuan 30.8% a ni daih a. Sub-Saharan Africa an tihah erawh mipain an tuar nasa a, Zimbabwe-ah 7.9% a nih laiin Côte d’Ivoire-ah chuan mipa 28.3%-in an tuar a ni,” an ti.
Zirchiangtute chuan khawvel pumah kumtlinglo laka hetiang tihna thleng zat bi hi kum 1990 nen khan a la danglam tam lo hle tih sawiin hmun thenkhata chanchin lawmawm lam nei leh a thena lungawi thlak loh lama hmasawn an awm zeuh zeuh bawk niin an sawi.