I Day leh budget pharh tuma CM thusawiah dikhlel a awm – Lalnunmawia Chuaungo

I Day leh budget pharh tuma
CM thusawiah dikhlel a awm
– Lalnunmawia Chuaungo
Tun tum Independence Day-a chief minister-in ZPM sawrkarin leiba an rochun a sawi leh budget a pharh tuma leiba an rochun zat a sawi chu a inang lo tih Congress hruaitu Lalnunmawia Chuaungo chuan a sawi.
August 22-a Congress Bhavan-a inkhawmah MPCC senior vice president Lalnunmawia Chuaungo chuan, Lammuala Independence Day lawmnaah chief minister hian a thusawi (speech) thusawi tur kha ama buatsaih nia a sawi bakah a bu ah pawh a inziak a. Chutiang ni si thu belhchian dawl lo, a dikhlel awm mange tih tur a sawi nual tih a sawi.
I Day lawmnaah hian state leiba tlingkhawm cheng vaibelchhe 13584.80 nen sawrkar bul an tan, nia a sawi laiin, nikuma anmahni puala budget pum an pharh hmasak bera thu a sawiah leiba tlingkhawm an rochun hi cheng vbch. 12966.93 a ni ti a sawi a, chu chu budget speech bu ah ziahlan a ni tih a sawi. “Chief minister thusawi hi khawi zawk nge rin tur leh rin loh tur tih hriat hleihtheih a ni tawh loa, hengte hi hi mipuiin kan rin ngam tawh loh chhan pawh a ni awm mange,” a ti.
I Day-a CM thusawiah tho hian, nikum kum bulah sumfai hman bang – opening balance cheng vbch. 520.65 an nei ta nia a sawi thu pawh sawiin, “”An inrenchem em em pawh hre lo mah ila, tunah hian zero based budgeting hi state tin leh sawrkar laipui pawhin kan hmang. Budget estimate kan siam hian kha financial year chhunga sum kan hmuh zat tur leh sum kan hmanralna tur kan siam thin a. Sawrkar kum tawp hnaih lamah revised estimate kan ti a, a chhan chu, kum bulah cheng chuti zat kan hmuh theih kan inbeisei a, a chang chuan kan inbeisei zat kan hmu lo thei a, kan inbeisei aia tam hmuh chang pawh a awm. Expenditure-ah pawh kan tum (estimate) aia tam hman chang a awm a, a aia tlem hman chang a awm. Kha’nga budget estimate kan siam khan a tum a thelh nasat viau chuan sawrkarin kan tih tur kan ti lo a ni,” a ti.
Zero based budgeting-ah chuan heti zat hi kan sum hmuh tur, heti zat hi kan sum hman tur, tih a ni a. Khami anga sum awm si sawrkarin a hman loh chuan a thawk tha loa, a efficient loa, a performance a tha lo tihna a ni tih chief secretary hlui Lalnunmawia Chuaungo hian sawiin, “Tlem azawng hman bang chu a awm ang, mahse cheng vbch. 520 chuang financial year chhunga an hmang hman lo a nih chuan an perform tha lo tihna a ni a, inchhuanna tur niloin mahni mawng hlimna, thil zahthlak lam a ni,” a ti.
Kum 2023- 2024 a SASCI chungchang sawi lar em em pawh kha Mizoram chanpual liau liau tur, 1st installment an rawn pek kha a hunah hmangin utilization certificate pe thei ni se, cheng nuai 23300 chuang state hmasawnna atana hmang thei tur an ni tih a sawi. Sum an manage thiam loh avangin hnathawktu tur implementing agency hnenah sum an pe chhuak thei loa, hna an thawk si loa, sawrkar laipui hnenah UC an pek theih loh avangin nuai 23300 chuang an chan ringawt tih sawiin, “A kum lehah kha kha lo hmang vek mah ila, kan chanpual tur, normative share min pek tho kha kan hmu leh si a. Chuvangin 2023- 2024 khan khatiang sum tam Mizoram hmasawnna atana hman theih tur kha kan hloh ringawt a ni. Nikumah a taka titha chuang si lo, khatianga sum kan hloh tawh lohna turin UC lem siamin 2nd installment an zuk hailut ve a, hei hi chief minister sawi dan a ni,” a ti.
Congress party chu rorelna fawng chelh rei ber an ni a, Mizorama hmasawnna infrastructure lian chu Congress sawrkar kuthnu deuh vek a ni tih an party hruaitu hian a sawi a. Sawrkarna fawng an chelh duh chhanah pawh Mizote tih dan phung dik tak ‘fatuten’ mipui ruai an hlui hmasa ang, tih chu an kalphung (principle) atan an zawm a ngai tih a sawi a ni.