Bike hmachawi chunga vuan loa khalh thui thei ber

Bike hmachawi chunga vuan loa khalh thui thei ber
Vuan lovin bike engtia thui nge i khalh theih ve le? Sumit Tomar, kum 24, Bijrol, Uttar Pradesh a cheng chuan motorcycle vuan lovin, a hma chawi chunga khalh thui thei ber record a siam. Record siam nan ian Bengaluru-Chennai Expressway-ah a tlan a, a motorcycle hma chawi chungin, a handlebar vuan lovin meter 1,700 a thui a tlan thei a, 2023-a Swedish rider Elliot Grondahl record siam, meter 918 a thui chu khumin, Guinness World Record thar a siam.
Sumit Tomar hi Indian Army-ah subedar tanglai niin, Bengaluru-ah a awm a, a record siam hi an khaw pualin a hlan a, “Nikum December khan record siam tum hian ka bei a, mahse, confirmation hi tun thla Diwali chawlh laiin ka dawng ta chauh a ni,” a ti.
Sumit Tomar chuan Army Service Corps motorcycle display team ‘Tornadoes’ te stunt show a hmuh atangin hetiang lamah hian a tui ve tan ta niin a sawi a, engtikah emaw Red Fort-ah ngei Prime Minister hmaa perform ve theih ngei a chak thu a sawi bawk.