FCRA siamthatna turah CM hoin Union HM hnenah rawtna thlen

Chief minister Lalduhoma hoin Mizorama kohhran hruaitute chuan Union Home minister Amit Shah an hmu a, Foreign Contribution (Regulation) dan siamthat tumnaah tunhma lam huapa hman loh nise tia an rawtna chu an tih hlawhtlin tur thu in a lo chhang.
Nilaini tlai khan chief minister ho hian Mizoram Kohhran Hruaitute Committee aiawhin secretary Rev. Lallawmthanga leh Council of Churches in Mizoram aiawhin general secretary Rev. Lalhmangaiha te chuan Parliament House-ah Union Home minister an hmu a. FCRA Bill 2026 leh FCRA Rules 2026 chungchangah joint memorandum an thehlut.
Joint memorandum-ah hian FCRA Bill 2026 leh a hnuaia dan hrang hrang chu tuna duan a nih ang hi chuan pawm harsa an tih thu an thlen a, siamthat a, ennawn a tul tih an tih thu an sawi.
An rawtna zingah, “He dan hi tunhma lam huap (retrospective) a hman loh ni se,” tih chu Union Home minister hian an ngenna ang hian, retrospective-a tih a ni loang tih a lo tiam a. He dan awmsa leh siamthat rawt tharna chu ziakin pek a lo tiam. Memorundum-a an thu thlen chu a mal malin a chhanna ziaka pek a lo remti bawk.
Heng bakah hian Airports Authority of India (AAI) hnena Lengpui Airport hlan thuai tura chief minister-in a ngenna chu, rang taka bawhzui a nih tur thu Amit Shah hian a lo hrilh.
Chief minister hian Cooperation department hmalakna hrang hrang a hmun ngeia hmuhpui tura a sawm angin, Union Home minister hian hun remchang hmasaah Mizorama lo kal a tum tuh a sawi a ni.
Parliament House pawna thuthar thehdarhtuten an lo kawmnaah chief minister hian, Foreign Contribution (Regulation) Amendment Bill 2026 chungchangah rawtna an thlen a, he dan thar hian hun kal tawh leh thil thleng tawh chu a huam tel dawn lo tih a lo hrilh tih a sawi. Ngenna dang erawh a mala endik bakah August 12-ah Parliament-ah sawiho a ni dawn tih a lo hrilh thu a sawi bawk.