El-Clasico-ah Real madrid an chak

Pathianni zan khan Spanish La Liga-ah inkhel ngaihven hlawh tak a awm. Khawvel pawhin an ngaihven em em El Clasico chu 2026-27 season-ah a vawi khat nan Barcelona khelmualk Nou Camp-ah khelh a ni. Inkhel hmuhnawm takah mikhual team Real Madrid in hnehna an chang am point thum hlu tak an hmu. Manager lar Jose Mourinho chuan Barcelona a ngam chhunzawm a, Real Madrid manager zingah El Clasico-ah tlawm nei lova khelh 13 ngawt kal tluang thei pathumna a ni thar.
FC Barcelona hian season liam ta khan an hmelma lian ber Real Madrid hi an ngam viau a, inelna hrang hrangah Real Madrid kawng daltu lian an tling. Hansi Flick hnuaia cheTha tak Barcelona hian an mikhual Real Madrid hneh leh ngei tum viau mahse an vanneih ni a ni lova, vanduai zawkah Tang ve thunin, uiawm takin an mualah ngei an tlawm. An hmelma lian Real Madrid lakah tlawm bawk mah se FC Barcelona hian table chung ber an luah chhunzawm thung.
La Liga season tharah tlawm la nei lo Barcelona hian an hmelma lian Real Madrid hneh ngei tumin Tan an khawh a, an mualah an khel chhe lem lo viau bawk. Na takin an khingpuite an nawr a, ball chang tam zawk ni chungin hlauhawm zawk an ni reng. Fuh taka an khingpuite nawrin goal thun theihna hun Tha nei Thin bawk mah se Raphinha leh Lamine Yamal te chuan an hun Tha neih an chhawr Tangkai zo lo. Midfielder nei Tha tak Barca hian ball chang tamin an khingpuite nawr na viau mah se a tawp an khar Tha thei lova, uiawm takin an hun Tha neih an hlah leh Thin.
Ball chang tlem zawk leh bet zawk ni deuh reng mahse Real Madrid chu vannei hmasa zawkah an Tang a, chawlhlawk dawn hnaihah vanneihthlak takin hmahruaina goal a thun. Kum naupang te ni chunga khawvela defender Tha ber pawl ni phak der tawh a, vawi tam tak Kylian Mbappe pawh lo dang chat tawhtu Pau Cubarsí a chesual. World Cup 2026-ah rawlthar Tha bera an thlan Cubarsi hian ball petchhuah a tumna lamah Real Madrid forward Kylian Mbappe a pet per. Mbappe a per hnuin ball hi goal-ah chiang takin a lut a, minute 41-naah Real Madrid in hmahruaina goal a thun. Vanneih goal hmang hian Jose Mourinho team ten 1-0 a hmahruai chungin chawlhlawk an hmang.
Chawlhlawk hnu lamah Barcelona in goal thun ngei tumin Tan an khawh a, an khingpuite an nawr tawm hle. Goal thun theihna hun Tha an chhawr Tangkai zawh lo zauh zauh hnuin a tawp an khar Tha ta nge nge. El Clasico-a cheTha thei tak Raphinha chuan minute 61-naah fuh takin a pet goal a, an si phurh a sut.
An si phurh an sut vangin Barcelona an phur thar hluai a, an khelmualah ngei an khel Tha chhunzawm hle. Barca hian na taka an khingpuite nawrin goal thun theihna hun Tha pawh an nei a, si nghak cheTha tak Andriy Lunin an paltlang zo lo. Barcelona tauh Tha leh hlauhawm zet mai chu Lunin hian pui zetin alo dang a, an team a chhanhim.
An hun Tha neih an hlah hnuin Barca in goal thun tumin Tan an khawh chhunzawm a, chak ngei tura ngaih an ni hman. An khingpui ten an nawr reng karah Real Madrid an talchhuak a, fuh takin an khingpuite an nawr tlang. Camavinga chuan deender Cubarsi leh si nghak Joan García a paltlang hnuin Mbappe tan Tha zetin a chhawpsak. Goal hmahruai thuntu Mbappe hian goal ruakah awlsam takin a pet goal a, minute 87-naah hma an hruai nawn lehna goal a thun. Mbappe goal thun hi Real Madrid in an hmelma lian ber Barcelona lakah an chakpui a, Nou Camp-ah ngei point thum hlu tak hmuh nan an hmang.
An muala tlawm Barcelona hian khelh 10 aTanga point 27 hmuin table chung ber an luah a. Real Madrid hian khelh 10 aTang veka point 24 hmuin pathumna an luah ve thung.