By RK Dawla
Mb 9366095658
-- Advertisement --
January thla tâwp, thlasik vanglai pêl tan mêkah hian, thing hnah tlakawlh chite chu an tlakawlh tan mêk a. A tlakawlh lo chite pawh an hnah a active lutuk lova, hahchawlh hun an hmang mêk a ni. Hetih hun lai tak hi a zar leh tang hlawi hun lai niin, a kungpui tan chhum (rejuvenation) hun lai a ni bawk.
HLAWK HLUAI NGE TLO-NA
Kan hriat thin leh beisei angin kan leilung leh sik leh sa hi a fit tâwk tawh lova. Farming kan luhchilh dawn a nih chuan kan sik leh sa atangin kan zir tan a tul ta. Lo neih, Park siam, Tui khuah, Kawng laih, huan tur siam etc vângin kan ramngaw kan tichhe reng a. Boruak tibawlhhlawh zual turin petrol/diesel hmang khawl chi hrang hrang kan uar tulh tulh a. tawih thei lo chi hrang hrang kan chawlût tam tulh tulh a, hei hian kan ramngaw leh lui/kawr tuite a luhkhung nasa tulh tulh bawk. Heng zawng zawng vang hian kan sik leh sa leh environment hian chhiat lam a pan telh telh a. Chu chu tuihna tlêm telh telh ang te, thlai natna leh eichhetu rannung puang angte-in a rawn lang chhuak nasa tulh tulh a. Vawiinah buaipui tham rih loh, mahse kum 4/5 liam leh meuhah chuan issue runthlâk tak tling thei thil hmuthiam pha smart farmer hi KFC aiin kan mamawh zawk!
A awmzia ni ta chu, tun hunah hian kan environment leh sik leh sa thlûk hmasa miah lova, tharhlâwk tur ngar ngara kan beih hi nakin lawka kan chhiatna zakhua tur a tling thei tihna a ni. Climate resilient farming hi dawhkan leh sum hmang ngawta chinfel chi a ni lo takzet a; skills, knowledge leh technology update tak nên struggle chi zâwk a ni! Kan Mizoramah hian heti zât farmer kan awm chung pawh a, a proportion tlêm zawk non-farmer châwm zawh chu sawi loh, mahni hâwp khawp ngei pawh kan thar mang lo hi – a manganthlâk a, pawi tih piah lam a ni chho mêkin a lang. Kan population leh market demand ngaihtuah lêk lova, mi chin uar ang kan han bûr ve chat mai phei hi chu…a nuihzatthlak lek lek zawk. Ngopa lamah thlasik dawnfawh an larpui dêk dêk a, a ram pum huap deuhthaw-in a sakechek nazawngin kan han ching ve ta chur chur mai ta a. Tukzana kan mamawh pawh ni hlei lo, chhâwl hâl châng chauha kan ei thin Dawnfawh kha a ni chauh bawk sia! Phai leh khawchhak lam atangin an rawn tawlh lût reng bawk nên, Bazarpuiah mihring lû aia dawnfawh rah a tam zawk lo hi kan vannei zawk ngawt alawm! Thluak hmang deuh leh a ngaihna hre deuh farmer, Smart Farmer hi chu kan mamawh chiang a ni. A hniak tam lam lam zui ngawt hi Crop selection-ah a tihchi loh, hei hi chian a tha.
Kan leilung tam zawk heti khawp hian a awihtlan a, kum tin ruah bawhawk a sûr chamchi a. Chutah leilung kalral ngaimawh nachâng hre miah lo, huan lû atanga hawi thla a, nui vur vura kumtawpa thar tur hisâp ta ngawt thin hi kan tam hian ka ring khawp a. Chutah, kan thlai a han sep sel deuh a, “chu chu a tha” nia an sawi ngei mai khan kan han kâp leh zawk zawk a. Kan ngaih a tha ta êm êm mai a! Mamawh chu kan nei chiang e.
Vawiina hlâwk viau hi a ni ngawt lo deuh a. A tlo tur a ni. Tlo tur chuan bultanna dik a pawimawh rualin bultantu dik a pawimawh zawk hial àwm e. Khawvel lo lum zelin kan Mizoram leilung, sik leh sa, tuihna leh khawsak phung a nghawng dan hi mithiamte sawi ngaihthla ngawt lo deuhin, i kalna apiangah chîk hmasa la, hma i sawnpui êm loh pawhin ngai chu i awh bik hauh lovang tih ka chiang!