A naute lakah Gurpreet duhkhawp lo

Sunil Chhetri chawl hnua Indian football captain mawhphurhna chelh chho ta goalkeeper Gurpreet Singh Sandhu chuan Nilaini zan do-or-die World Cup qualifying match-a 1-2-a mualneitu leh Asian champion ni bawk Qatar an hneh loh hnu khan a lung ni lo hle a, a team-mate rualho chu tun aia hriam zawk tura phutin, result vanduai tak an neih hnuah kha aia huaisar zawka che ve bawrh bawrh turin a pawlte a fuih.
First half minute 37-a Lallianzuala Chhangte goal hmangin mikhual India team khan sikhat faiin world ranking-a an aia sang daih leh home team ni bawk lakah sikhat faiin hma an hruai zet a, an hmahruai chhung pawh a rei a, hun pangngai tawp hma minute 15 a la awm tihah pawh 1-0 a la ni a, mahse, sawi hlawh takin Arab team-in an siphurh an sut a, ball-in Sandhu dinna lam goal mouth pawn line a pel tawh nia a lang chungin South Korean match official-te out loah an ngai a, India hmahruaina a tawp phah.
Indian team tana thutlukna chhe zet siam South Korean match official rualkhat – referee Kim Woosung, Kang Dongho leh Cheon Jinhee-te’n India goal kick ni tawh tura ngaih an ham duh loh avangin Qatar player Alhashmi Mohialdin cuan line pel tawh ball chu pawtletin Youssef Ayman chuan Qatar siphurh sutna goal a thun theih phah.
VAR hman ni ve hek lo le, India protest chu boruakah a thamral a; minute 85-ah sawisel tur eih awm loin Ahmed Al Rawi chuan 2-1-a mualneitu team chakna goal a thun zui ta a nih kha.
Group A hmahruaitu ni chungin Qatar an tlang a; an home-a Afghanistan hnehtu Kuwait-in dawtin round thumna an lut ve bawk.
World Cup khelh beiseina an hloh fel hnuah captain Gurpreet Singh Sandhu chuan X-ah post siamin, “Rinna leh beiseina kan nei tur a ni a, engkim thlen hnuah pawh chance kan la nei tih vawn reng tur. Nizan khan kan theihtawp chu kan chhuah ngei a, mahse, a la tawk zo lo,” tiin a naute a fuih.