Africa-a reserve ngaw lian ber pakhat kang thelh mek

Africa-a reserve ngaw lian ber
pakhat kang thelh mek
Namibia chuan an rama khuarel awm an humhimna hmun lian ber pathumnaa kangmei chhuak thelh turin helicopter leh sipai thahnem tak an tir chhuak.
Etosha National Park hi Africa chhim lama khualzinte hiptu lian tak a ni a, van sang atanga hmuh theih, salt pan awmna hmun niin a larpui em em a. An mang mai hlauhawm taka awm mek, tuivawk dum chi (black rhino) awmna hmun a ni bawk.
An ram environment ministry chuan ram kang hi kar hmasa Thawhtanni atanga chhuak kha niin an ring tih a sawi a, park ramri piah chiaha lungalhthei siam chhuahna hmun atanga kang kai a nih an ring tih a sawi bawk.
Chawlhkar khat vel a kan hnuah park chhunga antelope pakua a kang hlui tawm a, ram ngaw, ramsate awmna hmun tha a kang chhe tan bawk a. Hnim hring mawi tak awmna, Angola nena an inrina bul lawka awm, Omusati leh Oshana region a kang kai tan bawk.
Eptu MP Likando Rodrick-a chuan kang mei an thelh mai theih loh avangin sorkar a sawisel a, ruahmanna tha tak an nei lawk tur a nih thu a sawi a, nakin zelah a him theihna tura ruahmanna tha leh daih rei zawk pawh an neih a ngai tih a sawi bawk.
Inrinni zan khan sorkar hotute chu hmanhmawh takin an thukhawm nghal a, kang thelh tur hian kang thelhtu leh police 500 dang bakah mahnia inpete tirh belh turin an ti tih Prime Minister Tjitunga Elijah Ngurare-a chuan X-ah a tar lang.
Etosha National Park hi sq km 22,935-a zau niin Africa-a a lian ber pakhat a ni a. Kum tin khualzin 200,000-in an tlawh ziah niin sorkar chuan a chhinchhiah.
Khawmuala cheng chi ramsa 114 awmin sava pem chi za telin an pan thin bawk a, heng zingah hian flamingo pawh a tel.
Mi thiamte chuan arid savannah an tih hmunah hian ram a kang ve fo thin a, a hun bia a kan phei chuan a chhunga rannung chengte hriselna leh inthlahchhawn nan a tha zawkah an ngai a; mahse, ngun taka thlithlai a ngai tih an sawi.