Aizawlah Bru House din tum

Mamit bialtu MLA Er. H Lalzirliana chuan Aizawlah Bru House din tumin sawrkarin hma a la chho zel tih a sawi.
June 6 & 7 khan a bial khaw thenkhat Tuipuibari leh Rajivnagar bakah a chhehvel khuate chu MLA Er H Lalzirliana chuan tlawhin sawrkar school building leh BRTF kawng siam a en a. Sawrkarin a ngaihtuah ber chu mipui harsatna sutkian leh an mamawh pek a ni, tiin, Tuipuibari-in sawrkar high school an nei dawn ta chu a lawmpui tih a sawi.
Mizoram sawrkar chuan minority hnamte a ngaipawimawh a. Aizawl khawpuiah pawh Chakma House, Lai House, Mara House te awm tawhin tunah hian Bru hnamte tan Bru House din tumin sawrkar hotuten hma an la chho zel dawn tih a sawi a ni.
Mamit bialtu MLA hian a bial chhung khaw hrang hrang a tlawhnaah hian chungkaw 21-te hnenah puanthui khawl a pe a, pheikhawk chhe siamtu mi pahnih hnenah pheikhawk chhe siamna hmanrua a pek bakah silpaulin leh infiamna hmanrua engemawzat mipui hnenah a pe a ni.