Amah thlaktu tura rin, a fanuin sipai parade-ah Kim-a a zui

Amah thlaktu tura rin, a fanuin sipai parade-ah Kim-a a zui
North Korea hruaitu, Kim Jong Un fanu chu Nilaini zan khan Pyongyang-a military parade neihah a tel tih state media footage-ah a lang a, a pa thlaktu tur atana buatsaih zelna a nih thu sawi a ni.
Ju Ae tia hriat lar tleirawl hi a inlanna hi an rama politic-a thil thleng lian ber, rorel lai Workers’ Party Ninth Congress-a parade-ah a ni.
State media KCNA-in thlalak a tihchhuahah Ju Ae chu a pa bulah leh sipai hruaitu senior-te bulah ding chungin parade-a kut an vai lai a ni a. An pahnih hian savun dum trench coat an ha a.
Thlalak dang pakhatah chuan Kim leh sipai hruaitute bula fly-past a en lai a lang bawk.
KCNA hian parade-a hmeichhe naupang chanvo hi chiang takin a sawi lo.
South Korea- National Intelligence Service (NIS) chuan tun thla tir lam khan dan siamtute hnenah Ju Ae hian policy chungchangah mawhphurhna pek a ni tih an sawi a, hei hian ‘chhungkuaah thlaktu atana ruat a nih theihna tur lam a hawi’ tih a tilang niin an ngai.
Ju Ae hi kum thum kalta chhung khan a langsar zual hle a, kum 2022 tawp lama intercontinental ballistic missile kahchhuahnaah a pa a zui ṭumin vantlang hriatah a lang hmasa ber a, chutih lai chuan state media-te chuan Kim-a fanu ‘duh tak’ tiin an sawi.
Hemi tum hian a sam sei tak a nei a, savun jacket man to tak tak emaw, fur-trimmed coat emaw a ha fo ṭhin a, state media report-a thil thleng hrang hrang, missile enchhin, sipai kum champha leh ram pum huap lawmna lian tham tak takah hmuh a nih zauh zauh avangin a pa thlaktu tura rin a ni tan.
Ju Ae hi kum 2010 chho vela piang nia rin ni mah se, a kum hi finfiahna a la awm ngai lo.
South Korea intelligence thuneitute chuan Kim Jong Un leh a nupui, Ri Sol Ju te fanu a nih an ring a. A awmna hi a vawi khat nan vantlang hriatah a lang a, American basketball player hlui Dennis Rodman chuan kum 2013 khan hruaitu hian fanu ‘naute’ Ju Ae a nei tih a sawi a, Pyongyang a tlawh lai khan a fanu hi a hmu niin a sawi.
Kim fa dangte chanchin hi hriat tur a la tlem hle.
Tleirawl hian nikum September thla khan a pa hi China-ah a zuiin khawvel huapah a inlanna hmasa ber a ni.