AMC chhungah voter 233092 Aizawl district-ah voter 62629

On Nov 23, 2024 12 0

AMC chhungah voter 233092
Aizawl district-ah voter 62629
Municipal pahnih hnuaia local council leh Municipal pawnlam district 9-a village council inthlana hman tur Electoral Rolls Summary Revision 2024 neih tum meka behchhana hman tur draft electoral roll chu Zirtawpni khan district hrang hrangah tlangzarh a ni.
Aizawl district bikah, Aizawl Municipal huamchhung local council 85-ah voter 233092 awmin, hmeichhia 124472 leh mipa 108620 a ni a, in 64077-ah voter an awm a ni. AMC pawnlam Aizawl district-a village council 69-ah voter hmeichhia 32056 leh mipa 30573 niin, an vaiin voter 62629 an ni a, in 17877 a ni.
Aizawl Municipal huamchhunga local council leh Aizawl district huamchhunga village council electoral roll hi 2024 November 22 hian mipui en theiha tarchhuah a ni a. Hemi ni atang hian kumin November 25 atanga December 9 thleng electoral roll atanga paih, thun thar, siamthat ngai leh insawn duh tan dilna LLO/VLO hnenah thehluhna hun hawn a ni.
Hemi chhunga dilna lut hi kumin December 10-19 chhungin MERO/AMERO/ERO/AERO ten an endik anga, an enfiah zawh hnu in MERO/ERO ten thutlukna an siamfel anga, hming thunluh ngai, paih ngai leh siamthat ngai thliarhrang lehin, hemi hnu hian data entry (computer-a thunluh) thawh zui nghal a ni ang. Local/ village council final electoral roll hi 2025 January 8-a tlangzarh tum a ni.
Aizawl district election officer, bawrhsap Er Lalhriatpuia pawhin Aizawl Municipal hnuaia local council 85 leh Aizawl district-a village council 69 inthlana hman tur draft roll hi a tlangzarh a. Electoral roll fel leh thianghlim chu democracy rama inthlan huapzo, muanawm leh felfai nei tura bul intanna a nih avangin a buatsaihtu official – AMERO, ERO, AERO leh LLO/VLO te fimkhur turin a chah a. Local/ village council, political parties, tlawmngai pawl leh media-te chu electoral roll buatsaih kawngah tawiawm turin a sawm a ni.
Local council/ village council electoral roll hi MLA inthlanpuia electoral roll nen a hranpaa buatsaih a ni a, hemia inthun thar, insawn leh siamthat hi MLA e-roll atana rin nghal theih loh a ni.