Zirlai nei tlem school kaihkawp tum

Zirna siamthatna atan zirlai naupang nei tlem school chu a remchang apiang kaihkawp tum a ni tih School Education minister Dr Vanlalthlana chuan a sawi.School Education department chuan thla 4 kalta chhunga hma an lakna thlirletin Zirtawpni khan an thukhawm a. Kaihruaitu minister hian zirna siamthat hna thawh mekah school naupang nei tlem school chu a remchang apiang kaihkawp tum a ni tih a sawi a. School inspection tha taka kalpui a pawimawh tih a sawi bakah aikal lak chungchangah sawrkar a kaltlang dawn tih a sawi a ni.
School sak leh thawmthat hnaah a nih dan anga kalpui a pawimawh a, school-a thawkten bialtu DEO hriatpui loh chuan lo tihdanglam a remchang lo tih a sawi bawk.
“Education department-a thawktute tan office dawhkan hi kan pulpit a ni a, kan dawhkan hi Pathian tan hlan ang u,” Dr Vanlalthlana hian a ti.
Education consultant Dr K Thanzauva pawhin thu a sawi a. School-ah classroom-a zirtirna tih that a tul tih a sawi a, tuna kan dinhmun chu a tha tawk lo nia a hriat thu a sawi. School mamawh sawrkarin a pe vek seng loa, khawtlang nen tanrual a ngai tih a sawi a ni
Thutkhawmah hian School Education officer-te, MBSE, SCERT, Samagra Shiksha officer-te leh Education Reform Committee member-te an tel a ni.