An kawtkaiah Barca chak zo lo

Rawlthar kum 16 mi lek Lamine Yamal-a goal hnih leh Robert Lewandowksi goal khat lawm tur nei mah se Pathianni zanah Barcelona-in goal thum bawk an chhuah a, team talbuai Granada lakah hnehna chang zo loin 3-3 draw nen La Liga table-ah pathumna an luah chhunzawm.
Nou Camp goal hmahruai hi minute 14-a rawlthar Yamal-a tihluh niin, chawlhlawk dawnah Ricard Sanchez chuan Facundo Pellistri siamsak atangin mikhual siphurh a sut a; chutah on-loan Manchester United winger Pellistri hian second half tir lam minute 60-ah Granada hma-hruailetna goal a khung a, table mawngphah luaha a mawng ber chung chiah tawlhchhuahsan thei lo team talbuai mekin Nou Camp-ah hma an hruai!
Minute thum a liam leh a, Lewandowski chuan Catalan team siphurh sutin, ti chinah hian Granada an la beidawng duh lo a, minute thum a liam leh a, Ig-nasi Miquel chuan 3-2-a mikhual hmahruaina a thawh ve leh.
Barcelona hian an siphurh an sut nghal mai thei ta lo a, minute chiah a awm tawh tihah goal hmahruai khungtu rawlthar winger Lamine Yamal bawkin mualneitu team tlawm tur chhanna goal khungin, team pahnih hi 3-3-in an inhnehtawk a, Granada laka La Liga game hnih a khelhah Yamal hian goal thum a thun tling.
Title race kal laiah Barcelona tan lawm tharna tur a awm lo chhunzawm zel a, khelh 24-a point 51 hum chungin hmahruaitu Real Madrid lakah point 10 zetin an hnufual tawh a, pahnihna luahtu Girona nen pawh point nga laiin an inthlau.
Tarlan tawh thin angin, season tawp rual hian an boss Xavi Hernandez chuan club a chhuahsan tur thu a nemnghet tawh a, Catalan club boss thar tur inrinsiakna a vung chhoh mek laiin khelmualah Barca boruak a fuh tak tak thei lo.