MNF leh Congress hnathawh chin lungawithlak loh – VL Zaithanzama

MNF leh Congress sawrkar chu hna thawk loah an puh ngawt loa, an thawh chinah a lungawithlak loh zawk tih MLA VL Zaithanzama chuan a sawi.
Thawhtannnia ZPM office-a inkhawmah Aizawl West III bialtu MLA VL Zaithanzama chuan MNF leh Congress-in ram an lo siam tawhnaah engmah thawk loah an puh loa, an thawhchin erawh a lungawi thlak loh tih sawiin, “ZPM chuan ram kan siamtha thei kan ti a, min fiah turin mipui kan cho a, min enchhin rawh u, kan ti a ni. He rama mi chitin hi an phun luai luai a ni ber a, an beidawn tak vang niloin beiseina mual la sah pawh chiah loh awmin an hria a, a ti thei tur an la awma an hriat vang a ni. State hmasawn dangte umphak an chak a, corruption awm lohna state nih an duh a, danin he ramah hian awmzia nei se an ti a; awmze nei, hah man awma hnathawh an duh. Kan luipuite hman tangkai ve an chak tawh a, zirna tha neih an duh a, thalaite khawvel thar thlenga din an duh. Heng zawng zawng hi ZPM chuan kalphung tharah kalpui tumin policy-ah a bilh tel vek a ni,” a ti.
Kalphung tharah chuan sawrkar kan hrawn tawhten sum sem a, mipui thatchhiat zirtir a, intodelh kan hlat tial tial ang hi an ti ve dawn loa, mipuite taimak an zirtir dawn tih a sawi. “Mi taima an kang anga, hnathawhin awmzia a nei ang. Mi thatchhia leh pamhamten hmuhsit an hlawh tial tial dawn a, eiru leh kut tling loa sum late kan bitum dawn. Ram hnufual leh hmasawn thei lo ram apiangah eirukna a hluar thin an tih angin, kan ram pawh kan hmasawn theih loh dan thlir hian zep tur a awm lo. Thenkhat chuan ramin sum an siam a, an hausa thur thur a, keini erawh kan hmuh chhun chu engzat pawh nise dik takin mipui chanvo tur kan siamsak dawn a ni,” a ti.
Sawichhuah hnem leh thawhchhuah hnem aiin hman dan dik, an thiltih a tangkai dan, mipuiin a zar an zo dan chu an ngaipawimawh dawn tih a sawi bawk.
“Ram veitu mi thahnemngai, mithiam leh thlir zaute rumna leh au awin kan ram hruaitute a tiharh zo loa, hrereng chunga muhil der, ben harh zawh loh an nih avangin kan thlak thuai dawn,” VL Zaithanzama hian a ti.