Pathianni zan khan Wembley Stadium-ah FA Community Shield khelh a ni a. Inkhel hmuhnawm takah Arsenal chuan Premier League champion Manchester City chu vanneihthlak takin an hneh a, an kutah Community Shield a tlu lut.
Community Shield hi Premier League champion leh FA Cup champion team ten an inchuh thin a ni a. Season liam taah City hi inelna liana an champion kawp vangin EPL-a pahnihna Arsenal in Shield an chuh theih phah a, a vawi 17 nan an champion zui ta hial bawk. Community Shield-ah hian vawi 21 champion tawh Man-chester United chu champion ngun ber an ni a. Champion thar Arsenal hian champion tam lamah Liverpool an lehpel chiah a, champion ngun pahnihna an ni.
Community Shield-ah vawi hnih tlawm zawn tawh Manchester City hian tun hnaia an ngam leh an hneh than tak Arsenal lakah hnehna chan ngei tumin thapui an thawh. Manager Pep Guardiola chuan goal thun tumin an forward pawimawh pahnih Erling Haaland leh Julian Alalvarez te a luh rualtir a. Chelsea atanga an lak luh Mateo Kovacic-a’n bul a tan bawk. Arsenal manager Mikel Arteta pawhin a player thar pathum Kai Havertz, Declan Rice leh Jurrien Timber te a bul a tan tir vek a, an player tharte an che hmuhnawm hlawm hle. An forward thar Havertz hian chawlhlawk hmain goal thun theihna hun tha vawi hnih a neih chu uiawm takin a hlah a, a club tharah a hming a chher len loh phah. Gunners defender thar Timber a tlangnel nghal viau a, season tharah hmuhnawm takin a inlan zui tura ngaih a ni.
Wembley-a inkhel Arsenal leh City te hi muallaiah an indang chat tawn nasa viau a, goal hlauhawm an siamchhuak tam thei lo ve ve. Chawlhlawk hmain Arsenal hi hlauhawm zawkah an tang a, goal thun theihna hun tha an neih tum hnih chu uiawm takin an hlah ve ve. Gunners centre back William Saliba-a’n Ciy forward pawimawh Haaland chu hlauhawm siam thei lovin a dah tha. Inkhel hmuhnawm leh class sangah chawlhlawk hmain goal lut a awm thei lo phawt.
Chawlhlawk hnu lamah inkhel a hmuhnawm leh zual a, goal hnih hmuh tur a awm ta bawk. Goal thun tumna an innawr tawn chhen hnuin City bench atanga lut Cole Palmer chuan a hun tha neih hmasak uiawm taka a hlah hnuin minute 77-naah goal mawi zet mai a thun. Palmer hian box chhungah fuh taka ball a dawn hnuin far post ah mawi takin a pet kual lut a, City hmahruaina goal a thun.
Goal thun hmasak mamawh zawka ngaih Arsenal in goal an chhuah hmasak vangin inkhel a hmuhnawm zui ta viau lo. An si phurh sut turin an khingpuite an nawr hleithei meuh lova, hlauhawm an siam thei lo. An goal hnaih lamah ball an inpe kual nasa a, ball an inpek kual dan hi City duhdan a nih hial a rinawm. Hmun awl leh vanneihna zawngin si nghak Aaron Ramsdale-a’n ball vawrhchhuak thin mah se a khelhpui ten ball an chang hmasa thei lo. An khingpuite an nawr hleih theih loh vangin Arsenal hi City lakah tlawm leh nge nge tura ngaih an ni hman hial a, an khel en a hahthlak hman hial bawk.
Hun pangngai tawp thlengin Gunners hian an si phurh an sut thei lova, hun pek belh pangngai minute riat chhungin an si phurh an sut thei lo bawk. An intauh vanga Thomas Partey leh Kyle Walker te inhliam vangin Gunners hian hun an neih belh hlauh a, minute 101-naah vanneih thlak taka goal thunin an si phurh an sut. Minute 101-naah hian Leandro Trossard chuan tha taka ball la lutin a shot a, shot hlauhawm tak ni lo mahse City defender Akanji-a’n a lo dang per hlauh a, vanneihthlak si nghak Ortega rin loh lamah a lum lut a, Arsenal in an si phurh an sut.
Arsenal in an si phurh an sut hnu lawkah inkhel a tawp zui nghal a, penalty shhootout hmangin champion tur zawk zawn chhunzawm a ni. Arsenal tana pet hmasa ber Martin Ødegaard
an harsatna tawk lova a pet goal laiin City tana pet hmasa ber Kevin de Bruyne chuan goal bar a pet per dawp thung a, a thelh. Arsenal in an pet goal zel laiin City defender Rodri pet chu si nghak Ramsdale-a’n a dang a. Hemi hnu hian Arsenal tana pet hnuhnung ber Fabio Vieira chuan chiang zetin a pet goal a, an chakna goal a thun zui ta a ni.
City an hnehna hi Community Shield mai mah nise tunhnaia an ngam loh em vangin Arsenal tan result tha leh result lawmawm tak a ni. He an hnehna hmang hian season tharah pawh ngam zawkin an hmachhawn theih phah a beiseiawm. Gunners hi Community Shield an khelh hnu-hnungah an chetha viau a. City erawh chu Community Shield-ah vawi thum ngawt an tlawm zawn ta thung. City manager Pep Guardiola chuan Community Shield-a an tlawm thin chhan chu EPL-a an champion thin vang a nih thu a sawi zui ve thung.
Arsenal kutah Community Shield
Get real time updates directly on you device, subscribe now.
Next Post