Asia Cup khel phak lo India
Thawhleh zan khan AFC Asian Cup khel tur zawnna khelh chhunzawm a ni a, Singapore lakah an tlawm vangin India dinhmun a chhe leh zual a, Asian Cup khel turin an tling phak tawh lo. India an tlawm lai hian Thailand chuan nuamsa zetin hnehna an chang ve thung.
Asian Cup hmachhawn phak beisei zui tura chak mamawh India hi Singapore hmachhawn turin Fatora Stadium-ah an leng lut. Mikhual an nihna hmunah bul an tan tha a, goal thun hmasa zawkah an tang. India tan hian Mizo player Lallianzuala Chhangte chuan inkhel tan atanga minute 14-na lekah hmahruaina goal a thun. Hma takah goal an thun vangin an phur viau a, chak theih beiseina sang tak an nei zui bawk.
Phur taka inlan India hian goal thun belh tumin an khingpuite an nawr a, an khingpuite an nawr luatah an chesual. Singapore hian fuh zetin India an nawr let thut a, Song Ui-young chuan chawlhlawk dawn hnaih minute 44-naah goal thunin an si phurh a sut. Ui-young goal thun hnu hian goal dang a luh belh thei lova, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm chhunzawm viau a, Singapore an che fuh hmasa ve ta thung. Singapore tan hian an si phurh suttu Song Ui-young chuan minute 58-na lekah hma an hruai letna goal a thun. Hnufual zawk an nih hnuin India in an si phurh sut tumin tan an khawh nasa hle. Hlauhawm siam zauh zauh mah se hun tawp thlengin an si phurh an sut thei tawh lo va, chak mamawhna inkhelah Singapore hneh lovin an tlawm zui ta a ni. India hian an mamawh em vangin Apuia Ralte ko let mah se an chakpui zo ta chuang lo.
Group C-a inkhel dangah Hongkong leh an mikhual Bangladesh chu 1-1 in an inhnehtawk. Group C-ah hian Hongkong leh Singapore ten khelh li atangin point li an hmu ve ve a, goal difference-ah an la intluk zel bawk chungin Hongkong zawk hi table hmahruaitu an ni. A chung lama mi ten point riat ve ve an hmuh laiin a hnuai lama mi Banglandesh ten point hnih ve ve an hmu ve thung a. An goal difference pawh -2 ve ve ni. India in table hnuai ber an luah.
Khelh hmabak la nei bawk mah se India tan AFC Asian Cup khelh phak ngaihna a awm tawh lo. India hi World Cup khel phak lovin an tla tawh a, Asian Cup khelh phak tumin bei leh ngial mah se an tling zo leh ta chuang lo.