Assembly Secretariat-a hna lak dan zirlai pawl pahnihin chhuizui

Assembly Secretariat-a hna lak danah duhsak zawng inthun a ni em tih Mizo Zirlai Pawl leh Mizo Students’ Union ten an chhuizui mek.
MZP Gen. Hqrs. thuchhuak chuan tunhnaia National Institute of Technology (NIT) Mizoram thawktu lak chungchangah thil fel lo awm nia a hriat avangin a chhui tih a sawi a. NIT hnalak kalphungah NIT awmna state mi leh sa, tling leh tlak duhsak tura tarlan a nih ang zawm loin, ram neitute nekchep zawng leh hlamchhiah zawnga hmalakna a awm ngei tih hriat a ni tih a sawi.
He thil hi tha a ti lo hle tih MZP hian sawiin, hemi chungchangah hian NIT Mizoram director chu hmuin NIT kalphung anga hnaruak hnawhkhat turin an hrilh a. MZP hmalakna ang hian NIT Mizoram thuneitute chuan Mizo thalai tling leh tlak a la ta tih a sawi. ‘MZP hmalakna anga NIT Mizoramah hnaruak hnawhkhah a ni hi lawmawm kan ti a. Hun kal zel turah NIT kalphung anga hna diltute en hrang lo a, dik taka la thin turin NIT Mizoram thuneitute kan ngen a ni,’ a ti.
Tunhnaia Mizoram Assembly hnuaia thawktu lak chungchangah duhsak bik avanga thawktute vua leh vang lak an awm tih thawm awm chu an chhui mek tih MZP hian a sawi bawk a. RTI hmangin document hrang hrang dil a nih thu leh thil dik lo leh fel lo a awm a nih chuan, Mizo thalaiten an dikna chanvo an hmuh ngei theihna’n hma an la dawn tih a sawi a ni.
MSU Gen. Hqrs. pawhin thuchhuah siamin, tunhnaia Assembly Secretariat-a hna lakah thalai hna zawng mekte rilru tihnual thei thil diklo a thleng nia lang chungchangah deputy chief minister Tawnluia chu hmuin an sawipui tih a sawi a. Induhsakna leh thil diklo hmanga hna lak nia thuthang chu chhuichiang tur leh Mizo thalaite rilru tihnual thei thil a awm a nih chuan a titute dan anga hrem turin an ngen tih a sawi. ‘He hna lak chungchanga thil dik tawk lo thleng nia sawi hi Mizo zirlaite lungawi hma chu a tawp thlengin kan chhui dawn a, RTI hmangin zawhna thehluh a ni tawh a ni,’ a ti.