Mizoram University-in degree course examination 2023 result a tichhuak a, a pumpuiah zaa 76.86 an pass.
MZU hnuaiah hian college 29 a awm a, chu’ng zinga college 22 chu sawrkar enkawl niin, kohhran college 4 leh mimal college 3 an inziaklut mek a ni.
Bachelor of Arts-a exam beitu 5695 zinga 4308 an pass a, hei hi za zela 75.65 a ni. Science-ah exam beitu mi 631 zingah 504 an pass a, za zela 79.87 niin, Commerce ah 405-in exam beiin 365 an pass a, za zela 90.12 a tling a ni. B.Sc Home Science exam 36 zingah 24 an pass a, za zela 66.67 a ni. Exam beitu zawng zawng hi 6767 an ni a, 5201-in hlawntlinna an chang.
Bachelor of Arts bikah Aizawl City College leh Faith College chu pass percentage-a sang berin zirlai exam hmachhawn zawng zawng an pass vek a. Bachelor of Commerce-ah Govt. Champhai College, Higher and Technical Institute Mizoram (HATIM) leh St. Xavier’s College chu pass percentage a sang berin zirlai exam hmachhawn zawng zawng an pass vek bawk. Bachelor of Science-ah Pachhunga University College chu pass percentage-a sang berin zaa 87.41 an pass a; Bachelor of Science – Home Science ah Govt. Zirtiri Residential Science College titha berin zaa 66.67 an pass a ni.
Arts-ah PU College-a History Department zirlai Lalduhsaki chu pakhatna a ni a; Science-ah PU College ami tho Biotechnology zirlai Vanlaltlana, Commerce-ah Govt. J Buana College zirlai C Lalnunhlimi leh, B.Sc Home Science-ah Govt. Zirtiri RSC zirlai Saipari te chu pakhatna an ni.
Bachelor degree exam-ah 76.86% pass
Get real time updates directly on you device, subscribe now.