Kan faten ram leh hnam an vei theihna turin nuten kaihruai ang u, tiin MHIP Gen Hqrs. president Ngurmawii Sailo chuan a sawi. Mizo Hmeichhe Insuihkhawm Pawl (MHIP) vawi 49-na denchhena thuchah a siamah MHIP president chuan ram leh hnam hmasawnna atan leh a chhelai siamtha tura nasa lehzuala tan la turin MHIP member-te a sawm tih a sawi a. Ram leh hnam vei turin fate zirtir a tul, tiin, “Thalaite zingah ram leh hnam hmangaih nachang hre lo tam tak an awm ta. Keini an nute hian Israel fate angin kan fate hi ram leh hnam hmangaih nachang hre tur leh chutiang rilru pu chunga engkim ti turin kan zirtir a ngai. Silai leh hmanraw dang nen ramri kan pan ve thei lo, mah se, an thinlungah ram hmangaihna chi kan tuh nghet thei. Hnamdang nupui/ pasal nei lo turin zirtir ila, kan hnam boral lohna turin kan theih tawk theuhah tan la thar ang u,” a ti.
Mizo hmeichhiaten kil hrang hrangah hma an sawn viau laiin, Mizo mipate ber an hnungtawlh lohna’n nuten mawhphurhna an nei tih Ngurmawii Sailo hian a sawi. “Sual laka venna’n kan fapate inchhungah awm awltir mai mai loa kan chhawr hriam a, ram leh hnam tan an hlutzia kan hrilh fo a tul hle,” a ti.
Tunlai khawvel hmasawnna thangduang tak karah Pathian tihna tak tak nei turin mahni fate kaihhruai a ngai hle tih sawiin, thalaite zingah pawnlawi taka sakhuana kalpui leh social media a tha lo zawnga hmanna a nasa ta chu a pawi hle tih a sawi a. Mahni ngeiin mahni fate kan inchhungkhurah kan zirtir a, rilru thar nen chhungkuaa Pathian tih mi ni tura tan la thar turin a sawm tih a sawi a ni.
Ram siamtha tur leh kaihruai turin Mizo hmeichhiate an tha tawk a, Zoram tan thil tha tam tak an ti thin a, an ti zel dawn tih MHIP president hian a sawi a. MLA inthlanpui awm turah pawh insit miah loin rawn pen chhuak tura sawmin, “Kan ram tan hian Mizo hmeichhiate hian lungrual takin tan la tlang zel teh ang u,” a ti.
MHIP motto ‘Mite tanpui’ tih a nih angin, hmeithai leh fahrah, chanhai chhawmdawl kawngah tan la zel turin MHIP member-te a chah a. MHIP branch hrang hrangin Myanmar, Bangladesh leh Manipur atanga raltlante an theih ang tawk theuha an tanpui avangin MHIP Gen. Hqrs. hmingin lawmthu a sawi tih a saiw bawk.
MHIP Day hi hmun hrang hrangah hman a ni a. MHIP Gen. Hqrs. hruaituten branch hrang hrangah an hmanpui.
MHIP hian general headquarters hnuaiah Sub-Hqrs 10, Block 26, Joint 19, Branch 758 neiin, member 2,80,000 vel a nei mek.
Ram leh hnam vei turin nuten kan fate zirtir ang – MHIP president
Get real time updates directly on you device, subscribe now.
Prev Post
Next Post