Kuhva phur check-tu police duty ‘check’ tu duty indah lehchhawng

Hachhek bial chhunga dan loa kuhva rah tawlhruk paltlang tumte lo check thin tura check post-a duty police-te lo ‘check’ leh chhawng turin kuhva chingtute chuan ‘special duty’ an indah ve leh.
Kuhva phur check-tu police duty
‘check’ tu duty indah lehchhawng
Hachhek bial chhunga dan loa kuhva rah tawlhruk paltlang tumte lo check thin tura check post-a duty police-te lo ‘check’ leh chhawng turin kuhva chingtute chuan ‘special duty’ an indah ve leh.
The Aizawl Post thudawn danin, July 5 zan khan Mamit district Zamuang kaltlang tur kuhva phur lirthei a kal tih Hachhek Bial Kuhva Chingtu Pawl (HBKCP) leh mipuiin thu an dawng a, anmahni kutzala la mai loin, Zamuang Police Check Post-a police duty-te ngaihchan nise, tiin a rukin enthlatu (special duty) an insiam a, zan dar 12 pelh hretah truck pahnih hian check post an thleng a, police duty-ten lo tiding mumal loin an motor registration number an en a, an kaltlang tir ta mai tih sawi a ni.
Hetia police duty-ten awlsam taka check post an paltlang tir hi hrethiam loin mipui thinur chuan kuhva phur lirthei hi an umzui a, Zamuang leh Zawlnuam inkar kawng, km. 2-3 velah manin an hruai let a. Hemi hnu July 6 zing dar 6.30 vel khan lirthei pahnih leh an kuhva phurh hi Kawrthah leh Rengdil inkarah a kang palh ta nia sawi a ni. Kuhva leh a phurhna lirthei kan chhan hi hriat a ni loa, ruah a tla chiap chiap a, tek tlain a deng aniang an ti, tiin thudawnna chuan a sawi.
Dan loa kuhva phur pahnih kang ta hi Ashok Leyland ve ve – MZ 01K 9510 a khalhtu leh neitu nia hriat Lalramthara s/o Lalnunsanga, Maubawk Aizawl leh MZ 01K 9511 a khalhtu leh neitu nia hriat C Lalbiaktluanga s/o C Lalrinawma Falkland Aizawl an ni. Heng lirthei pahnih hian kuhva bag 60 ve ve a phur a, bag khatah hian kg.80 a awm a ni.
Zamuang Police Check Post-a duty thin police zingah mipuiin an rin zawh loh an awm avangin special duty tur pawh a ruka ruahman an ni tih HBKCP hruaitute chuan an sawi a. Kuhva ro tawlhruk avanga Hachhek bial mipui harsatna sukiangtu a nih beiseia mipuiin check post an siam dan leh mipui hmakhua ngaihtuah loa mahni hmasial, mipui tana rintlak loh police an lo awm chu na an tiin, police fel tak tak kara hetiang lo tlazep hian police a tihmingchhia a, an lakah mipuiin rinna an hloh phah nia an hriat thu an sawi.
Kuhva chingtu mipui hian dan phal loh kuhva man duh lotu police zingah ‘black list’ an nei tawh niin an sawi a, anmahni kutkawih ngei, check post pawh mipui hian an sawisa nual tih thu dawn a ni.
Kawrthah Police hotute chuan check post-a duty-te hian kuhva phur lirthei hi an tlan chak lutuk avanga an tih din zawh loh thu an sawi a ni, tiin, thil thlen dan hi Mamit SP-ah an report tawh a, he thil thleng avang hian FIR an la dawng lo tih an sawi.
HBKCP hruaitute chuan police ten kuhva phur lirthei hi a tlanchak lutuk a, an tiding thei lo, tia an sawi chu special duty-te hmuh laia thil thleng a nih avangin dawt a ni a, tih din an tum chhin loa, lirthei number an en hnu hian an tlantlang mai niin an sawi thung.