Balu lakna chimah 3 thi
June 27 khan Champhai district Melbuk ram Tiau luia balu lakna khur chimah a chhunga hna thawka awmte chhilhin mi pathum an thih phah a, pakhat a hliam.
Thudawn danin, Ningani chawhma dar 11.00 vel khan Myanmar nena inrina bul, Melbuk rama Tiau luiah balu lakna atana hman, feet 40 vela sei, feet 6 vela thuk leh feet 7 vela zau chu a chhunga balu la an awm mek laiin a chim a, Lalmalsawmdawnga (16), Melbuk; Laltandika (20) Tahan (Myanmar) leh Lalmuankima (18) Melbuk chu chhilhin a hmunah an thi a. Lallawmsanga (16) Melbuk chuan hliam na lutuk lo tuarin Champhaia Med-Aim Hospital-ah enkawl a ni a, a ngaihtuahawm lo nia sawi a ni.
Melbuk khua mi pahnih hi nizan khan lumenpui an ni a, vawiinah vui an ni ang. Tahan bul Saikhua ami Laltandika hi an khuaa cui turin lak a ni.