Europe, Arab, Canada leh US ten Gaza tun dinna tur thawh inhuam

Europe, Arab, Canada leh US ten Gaza tun dinna tur thawh inhuam
European leh Arab ram, Canada leh US chuan Gaza tun din lehna tura $ tluklehdingawn 70 mamawh chu thawh an tum niin UN thuneitu sangin Thawhlehni khan a sawi a, kum hnih indona avanga thil chhia awmkhawm chu Giza-a pyramid-te let 13 zeta tam a nih thu a sawi bawk.
United Nations Development Programme (UNDP) hotu, Jaco Cilliers-a chuan Israel-in Hamas a beihnaa thil chhia awm khawm hi ton maktaduai 55 zet a tlin thu leh a nih dan pangngaia Gaza tung ding leh tur chuan kum tak mamawh a nih tur thu a sawi.
“European leh Canada telin kan thawhpuite atangin chanchin lawmawm lam kan hre mek zel a ni,” tiin tum an inhuam ve thu an sawi tih thuthar lakhawmtute a kawmnaah a sawi a, US nen pawh sawiho mek a ni tih a sawi bawk.
Gaza-ah hian inkahhai puana kalpui a nih hnuah Palestinian tlanchhia sang tel chuan an in chhe tawh panin an kir mek zel.
Kum hnih chuang Israel-in an beihna avang hian Gaza hi vaivutah a chang vek tih theih a ni a, Gaza-a health ministry chuan mi 68,000 vel an thi bawk niin a sawi.
Thil chhia tamna ber hi indona a nasatna hmun, Gaza City-ah a ni a. United Nations Satellite Centre (UNOSAT) chuan in ding 83% chuang a chhia niin an sawi.
UNDP chuan Gaza Strip-a hnawk awm ton 81,000 chu then fai a nih tawh thu leh hna thawh mek zel a nih thu a sawi.
Israel hian Hamas kaihhruai helhovin October 7, 2023-a an ram beia mi 1,200 vel an thah leh hren tura mi 251 an hruai atang khan Gaza hi sipai chakna hmangin a bei a ni.
Kar hmasa khan US President Donald Trump-a rawtna angin inkahhai an puang a, Hamas hian Gaza-a Israeli an hren la damte chhuahin Israel pawhin Palestinian an mante an chhuah bawk a, ‘kum hnih indona chu a tawp ta’ tih Trump-a hian a puang a ni.