Bangladesh journalist sorkarin man

Bangladesh chanchinbu lar taka journalist chu food price sang zelah ‘false’ news tichhuaka puhin lung inah khung a ni.
Prothom Alo daily journalist Samsuzzaman Shams chu man niin bail pawh phalsak a ni lo zui a.
26 March-a Independence Day ni takin a story chhuah avangin ‘sorkar tihhmingchhiat tuma puh’ a ni a. Rights activists te chuan amah an manna chu hnawlin sorkar chu press freedom rahbeh tumah an puh thung.
Sorkar chu insawithiam thungin mahse media rights group te chuan kum 2009-a Awami league tena thuneihna an chan hnuah zalenna rahbehin a awm tial tial an ti thung a.
Reporters Without Borders te chuan Bangladesh chu nikum khan World Press Freedom Index-ah Russia leh Afghanistan hnuaiah ram 180 zinga 162 naah an dah hial a ni.
Shams hnathawhna chanchinbu hi Bangladesh-a ni tin chanchinbu thiltithei leh lian ber niin Nilaini zing khan plain clothes police te chuan a chenna in atangin an man a ni.
Shams report hian Bangladeshis mi pangngai tena ni tin nun an hman dan leh thil tawn a te a tarlang a. Chuta labourer pakhat a ziah chuan, “Buhfai kan lei zo lo a nih chuan zalenna hmanna eng nge ni ang,” tih te a tel a ni.
Russia-in Ukraine a run avanga khawvel huapa food price sang zel nghawng pholanna anga ngaih a ni a. Prothom Alo article hi mi tam takin an share zui a, mahse, Facebook-a an post-naah thlalak dik lo an hmang hlauh a.
“Kan tihsual kan hriat hnuah kan la thla leh nghal a, sawifiahna kan siam zui nghal a ni,” tiin Sajjad Sharif, executive editor chuan a sawi a. “Mahse, a original report chu a danglam hauh lo va, Labourer in food price chungchanga ngaihdan a sawi chu thudik a la ni reng,” tiin a sawi bawk.
Mahse Awami League Party thlawptute chuan ram hmel tihbalh tumna angah an ngai thung a. Police te chuan chanchinbu editor Matiur Rahman bakah he chanchinbu video journalist pawh an chhui chiang nghal bawk.
Law Minister Anisul Haq chua Shams te chuan thudik lo tarlangin buaina chawhchhuah an tum a ni a ti a. “Thubuai hi sorkar ni lovin mimal theh luh a ni a, dan angin thil kalpui a ni ang,” a ti ve thung a. He chanchinbu publisher pawh he report a mawhphurtu tia sawiin police te chuan an chhui chian tur thu a sawi bawk.
Hetihlai hian Media Freedom Coaltion chuan tun hnaiah journalist te tihchepna nasa tak a awm tiin an sawi thung a. Bangladeshi journalists te chuan Sheikh Hasina sorkar-ah harsatna an tawk nasa an ti bawk a. Bangladesh sorkarin Digital Security Act (DSA hmangin kum 2018 atang khan thubuai 280 lai journalist te a siamsak tawh an ti bawk.