Bay of Bengal-a thlivir inmung mekin Nilainiah Tamil Nadu thleng dawn

Bay of Bengal-a thlivir inmung mekin Nilainiah Tamil Nadu thleng dawn
Bay of Bengal chhimthlang lama thlivir inmung mek chu Nilaini hian cyclone-ah a insiam hman dawn a, hmarthlang hawia kal zelin ni hnih hnu velah Tamil Nadu vaukam a thleng dawn niin India Meteorological Department (IMD) chuan a sawi.
Tuna deep depression ni tawh, Cyclone Fengal tia a hming an phuah tur hi Trincomalee atanga chhimchhak km 310, Nagappattinam chhimchhak atanga km 590, Puducherry chhimchhak km 710 leh Chennai chhimchhak km 800 vela hlaa Thawhlehni khan a awm mek.
“Hmarthlang hawia kal zelin November 27 hian cyclonic storm-ah a insiam dawn a. Hmarthlang hawia kal zui zelin Tamil Nadu vaukam, Sri Lanka tuipui kam hrulah a kal zel ang a. A chevel hi kan thlithlai reng a ni,” tiin IMD chuan Thawhlehni khan a sawi.
Nilainiah hian Tamil Nadu leh Puducherry-a hmun thenkhatah ruah tam tham tak a sur thei a, a tuk ni hnihah pawh la sur thei niin an sawi.
Andhra Pradesh leh Rayalaseema-ah pawh Nilaini leh Zirtawpni inkarah hmun thenkhatah ruah tam vak lo sur thei a ni bawk.
Thlivir inmung mek avang hian sangha mantute chu Bay of Bengal chhimchhak leh Sri Lanka leh Tamil Nadu vaukamah Zirtawpni thleng chhuak lo turin IMD chuan a rawn bawk.
IMD chuan ruah sur tur avang hian tui lian, hmun hniam laia tui tling leh inkalpawhna tibuai thei khawp ruah a awm thei niin an sawi bawk.