Khan-a thlawptuten khawpui luhchilh, para police pali thi tawh

Khan-a thlawptuten khawpui luhchilh, para police pali thi tawh
Lung ina tang mek, prime minister hlui, Imran Khan-a tantu sang tel chuan Thawhlehni khan an mi thlawp chhuah zalen a nih phuta kawng an zawhah Pakistan khawpuia anmahni dalna tur khawng tak siam chu an sutlang.
Mipuite hi Islamabad khawpui laili pan tum an ni a, venhim hna thawktute nen innawrin a hnawh darh nan tear gas leh thelret silaimu hmanga kah an ni.
Prime minister pisa chuan paramilitary pali an thi a, a titu-ah Khan-a thlawptute a puh a, a finfiahna erawh a la awm lo.
Khan-a hi puhna hrang hrang leh thiam loh chantirna avangin kum khat chuang a tang tawh a, amah erawh chuan an puhnate hi politics thil vang mai mai niin a sawi ve thung.
Cricket star thin, politics-a inhmang zui ta hi lung in chhung atang pawhin Pakistan politics-a huhang nei lian tak a la ni a. February-a an inthlanah pawh khan a kaihhruai, Pakistan Tehreek-e-Insaf (PTI) party mite chu independent-in an ding a, a tling tam ber an ni thio.
Sorkar siam thei khawp erawh an nih loh avangin an elpuiten sorkarin intawm an siam ta a ni.
Lungawi lote hian Khan-a chhuah an phut bakah he inthlan hi a result a dik lo va, vote tihchingpen nia sawiin an duh lo va, sorkar erawh chuan engmah dik lo a awm lo niin an sawi ve thung.
Khan-a hian amah thlawptute chu kartawpah khan khawlaia chhuak khawm turin a ti a, ‘a tawp nan’ inkokhawma an khawpuiah chuan an thil phut an nawr chhuah hma awm tlat turin a ti.
He thil hi thuneituten vantlang punkhawm an khap hnu a ni.
Sorkar chuan Islamabad-a kawtthlerte chu an kaltlang thei loh nan lawnga bungraw phurhna bawm lian (shipping container) hmangin an dang a, an ram chhung hmun hrang hrang atangin police an chah khawm bawk.
Pakistan-a interior minister chuan lungawi lote hi hmun dangah an thil phut nawra awmna tur hmun an kawhhmuh a, an duh lo niin a sawi.
Hetiang boruak a nih avang hian hmun thenkhatah chuan internet service tihtawp lailawk a ni a, sikul leh college pawh tharum thawhna thlen hlauhthawnna avangin khar a ni.
Thawhtannia khawpui laili pana an kal tan hnuah lo dan tum viau mah se Thawhlehni chawhnu lamah kha chuan an hnaih tawh hle a ni.