MZP-in HSSLC topper ho chawimawi

Mizoram Board of School Education-in Higher Secondary School Leaving Certificate Exam 2026 result a tichhuah taka Mizo topper ho chu Thawhlehni khan Mizo Zirlai Pawl chuan a chawimawi.
Topper chawimawite hi, science stream-ah Lalmoipuia Lawmzual s/o HL Lawmzuala, arts stream – Lalnunhlui d/o Lalbiakliana Sailo leh, commerce stream – Vanlaltleipuia s/o Sammy Lalmuanzuala Chhangte an ni.
Hmanpuitu minister Prof. Lalnilawma chuan, Mizo zirlai tam tak zinga mark hmu sang ber ni thei topper-te chu chhuanawm a tih thu a sawi a. Mizo zirlai leh thalaite kan harh thar a, hnamdangin an tih theih ang kan ti ve thei a ni tih hre tura chahin, tan la sauh sauh turin a fuih.
MZP president Dr C Lalremruata chuan, zirlaiten scholarship dil tur kan hriat chin chu tribal leh merit scholarship a ni mai a, nu leh pa tibuai lo thei ang bera kan tuina zawng emaw kan zir zawm theihna tur scholarship tam tak a awm, tiin, hengte hi ngaihven tur leh central service lama kan inziahtlin theihnan theihtawp chhuaha bei turin a fuih.
Sawrkar sikula tu leh fate dahten result that loh leh an tih chhiatin zirtirtu thenkhat thiam loh an chantir thin laiin, private zirna ina dahte chuan an ngaihven reng a, hemi ang hian sawrkar sikula zirlai dahtu nu leh pate pawhin enpuia ngaihven turin a sawm tih a sawi bawk.