Bill sawihona leh a behbawm…

Mizoram Legislative Assembly 9-na, 4th Session kal mekah, nimin khan Bill pathum sawiho a ni a. Chief minister bill put luh ‘The Mizoram Goods and Services Tax (First Amendment) Bill, 2025’ chu sawihona awm hran lova passed a ni a. Labour, Employment, Skill Development & Entrepreneurship Department changtu minister Lalnghinglova Hmar Bill put luh pahnih — ‘The Mizoram Youth Commission Bill, 2025’ leh ‘The Mizoram Private Placement Agencies (Regulation) Bill, 2025’ erawh sawiho a nih hnuah passed a ni.
‘The Mizoram Youth Commission Bill, 2025’ sawiho a nih hian, a bill chhung thu luhchilh aiin a chhehvel chungchangin sawi a hlawh deuh a. He Bill hi sawrkar hmasa hun laiin amendment (2015) siam hnan a lo nih tawh avangin, Bill thar anga cheibawl leh chiam lovin, Amendment angin kal zui mai se tih chu opposition member ten an auchhuahpui deuh ber a. Hemi chungchangah hian House Leader chuan amendment-a tih that mai chi a ni tawh lo, tiin a sawi ve thung a. Leader of Opposition chuan ram hruaitu kal hmasa tawhte diriam taka thu sawiah House leader chu puhin Bill an pass pui theih loh thu sawiin Opposition member te hian House an chhuahsan ve thung a ni.
Chawhnu lama ‘The Mizoram Private Placement Agencies (Regulation) Bill, 2025’ sawihona boruak erawh a tha hle a. House member-ten Bill an chik tlangin, a bikin Opposition member zingah, ‘section, sub-section, clause’ ‘chumi khami chu’ tia luhchilh nghal hmiah hmiah an awm nual. Hetiang hian Bill sawihona boruak hi awm zel thei se, chu chu “Legislator’ nihna nen pawh a inmawi thlap. Bill sawihona neih laia politics hamthatna lam tuipui zawk tlat anga ngaih theih hi Legislator-te chuan pumpelh thei se, a lo ngaithlatu mipuite tana hlawk thlak taka an ‘role’ an ‘play’ hi an duty pakhat tur niin a lang e.