Ningani zing khan NBA regular season khelh chhunzawm a ni a. Portland Trial Blazers in Utah Jazz an hneh tumin Blazers player pawimawh Damian Lillard chuan point 60 ngawt a thawkchhuak a, a vul hle. Inkhel dangh team lian Golden State Warriors leh Los Angeles Lakers ten hnehna an chang bawk.
-- Advertisement --
Portland Trail Blazers hian Utah Jazz lakah bul an tan tha lova, quarter hmasa berah point 12 ngawtin hnufual zawkah an tang nghal. Bul tan tha lo mahse second quarter ah an insiam tha a, point 47 zet thawkchhuak in, point 14 ngawtin an in khingpuite an chungtlak a. Point hniha hmahruai chungin chawlhlawk an hmang.
Chawlhlawk hnu lamah Blazers an khel tha chhunzawm a, third quarter ah point 9 in an sang zui leh. Point 11 a hma an hruai hnuin quarter hnuhnung berah point khatin hnufual bawk mahse, point belhkhawmah 134-124 in hnehna an chang. Utah Jazz an hneh tum hian Portland Trail Blazers player pawimawh Damian Lillard chuan point 60 zet a thawkchhuak a. Hei hi season kal meka point a thawhchhuah tam ber tum a ni. Lillard hian Jazz lakah hian three point vawi 9 a vawmlut. NBA ah three point atangin point 2,292 zet a thawkchhuak tawh a, NBA a three point atanga point atanga point thawkchhuak hnem parukna a ni mek.
Ninga zinga inkhel dangah champion lai Golden State Warriord chuan hnehna an chang a, an khingpui Memphis Grizzlies chu point 122-120 in an hneh. Griezzlies an hneh tum hian Warriors player pawimawh Stephen Curry chuan point 34 a thawkchhuak. Warriors tana point thawkchhuak hnem ber ni bawk mahse hun tawp dawna a chet mawi loh vangin hun tawp dawn tepah hnawhchhuah a ni thung.
Season kal meka chetha lo, table hnuai lama awm ngar ngar Los Angeles Lakers chuan ninga zing khan hnehna an chang ve ta nawlh a, point 113-104 in an khingpui San Antonio Spurs an hneh. Spurs an hneh tum hian LeBron James chuan point 20 a thawkchhuak a, assist vawi 11 a neiin, ball sawhlet vawi kua a dawng tling bawk. James hian NBA chanchina point thawkchhuak hnem ber ni turin point 157 chiah a mamawh tawh.
Lakers an chak rual hian Giannis Antetokounmpo point 33 thawhchhuah chhawr tangkaiin Milwaukee Bucks chuan point 107-99 in Denver Nuggets an hneh bawk.