Nilai zan khan English Carabao Cup semi-final thawhkhatna khelh chhun-zawm a ni a. Manchester United chuan City Ground a an khingpui Nottingham Forrest chu si thum faia hneh in, final an hnaih ta hle. Nottingham Forrest an hneh tum hian United player thar Weghorst chuan a club thar tan a vawikhat nan goal a thun.
-- Advertisement --
Premier League ah Arsenal laka an tlawm hnua inkhel an hmachhawn hmasak berah United hi City Ground-ah an lenglut a, Nottingham Forrest an luhchilh. Nottingham ram ngaw ah ngampa takin hun an hmang a, goal pawh an thun hma hle. Inkhel tan atanga minute rukna lekah Casemiro siamsak atangin Marcus Rashford chuan hmahruaina goal a thun. Manager Erik ten Hag-a’n an hnena cham chhunzawm tura a kar Rashford hian United tan a khelh hnuhnung vawi 10-ah goal 10 zet a thun a, a chetha tluang hle. Rashford goal thun tur siamtu Casemiro khan hrem vangin inkhel pawimawh takah Arsenal a hmachhawn thei lova, Carabao Cup semi-final ah United player pawimawh a nihzia a rawn lantir leh nghal zat.
Hma takah goal thun mahse United hian goal dang thun belh turin hun an duh rei ta viau thung. Goal thun tuma an khingpuite an nawr fe hnuin chawlhlawk dawn tepah an che fuh nawn leh. Minute 45-naah United in loan a an lak luh Wout Weghorst chuan an goal hnihna a thun a. A club thar tan a goal hmasa ber a thun hian manager Ten Hag ngei pawh a thawktir huaiin a rinawm a. A lakah beiseina sang tak nei a, goal a thun mai loh vanga sawisel hmante pawh Nottingham Forrest laka a goal thun hian an ka a hup tura ngaih a ni bawk.
An mikhual lakah si hnih phur in, goal thun mamawh viau mahse Nottingham Forrest in an si phurh sut turin hun tha an insiamchhuah tam thei lo. Goal thun an mamawh em em laiin goal an chhuah belh leh ta zawk. Hun tawp dawn tep minute 89-naah Bruno Fernandes chuan United goal thumna a thun a, an chakna a nem nghet. Hun tawp thlengin goal dang a luh belh tawh lova, United chuan si thum faia hnehna chang phawt in, ke khingkhat in final an lut tawh.
Si thum faia an hneh tawh Nottingham Forrest nen hian Old Trafford ah second leg an khel leh dawn a, United hian nuamsa takin final an lut tura ngaih a ni. Semi-final hmasa zawkah Newcastle United chuan si khat faiin Southampton an lo hneh tawh a, Magpies hian St James Park ah hnehna chang nawn lehin, final luh an tum hle ngei dawn. Final-ah Manchester United leh Newcastle United te an inhmachhawn a nih chuan inkhel hmuhnawm tak a nih ngei a rinawm