Blogger thihna avangin Nairobi-ah lungawi lohna lantir nasa

Blogger thihna avangin Nairobi-ah lungawi lohna lantir nasa
Kenyan lungawi lote leh sorkar lamtang nia hriat mipa thalai rual, tiang kengte chu an khawpui, Nairobi lailiah an intualvuak.
Mipuite hi ni 10 liam taa blogger leh zirtirtu, Albert Ojwang-a police-in an kawl laia a thih avanga lungawi lohna lantir leh police officer lawk ber bâng tura phuttute an ni.
Police chuan Ojwang-a kha ama intihhliam avanga thiah an puh a; mahse, a ruang an endiknaah chuan sawisakna avanga thi ni ngeiin hriat a ni thung a. He thil thleng avang hian police pahnih man an ni tawh.
Thawhlehni chawhma lamah khan khawpui hmun laili, sumdawnna hmunah thalai mipa, motorbike-a chuang, hruihrual leh tiang kengten lungawi lohna lantirtute hi an bei a ni.
Video thehdarhah chuan heng mite, tual chhung miten ‘goons’ tia an sawi maite hian lehlam lehlam atangin mipui pungkhawm hnawh darh nana teargas kaptu police-te nen an bei niin a lang.
Police chuan heng mite nena inzawmna an neih loh thu sawiin ‘ralthuam hriam tak tak keng goon rualin vawiina lungawi lohna lantirtute hi an bitum a. Police chuan tel vena kan nei lo va, dan lova pungkhawmna erawh kan phal lo’ tiin an sawi.
Reuters news agency chuan khawlaiah a lua hliam tuar mi pakhat a let reng tih an sawi a. A hnuah AFP news agency-in damdawi inah lak niin a la dam a, a dinhmun erawh a tha lo hle niin a tar lang.
Thuchhuah an siamah police-ten pungkhawm hnawh darh nan hian anti-riot shotgun an hmeh puah thu an sawi a. Lungawi lohna lantir chhan bera a mawhphurtu nia puh police chu man a ni tawh tih an sawi bawk.
Officer-te hian khawpuia kawngpui pawimawh deuhte chu khawpui laili leh sorkar hmunah lungawi lote an kal loh nan an dangchat.
Deputy police chief Eliud Lagat-a chu Ojwang-a thihna chhui mek chhung a hna atanga chawlh lailawktir rih a ni.
Mihring dikna chanvo humhalhtute erawh chuan blogger laka complaint thehluttu leh man a nih phahna a nih bawk avangin bâng turin an duh a. Lagat-a hian kum 31 mi hi social media-a amah tihmingchhetuah a puh a ni.
“Kan tlawm mai dawn lo va, Lagat-a hi a bân ngei kan duh a ni,” tiin mipui zinga pakhat chuan a sawi.
“A bân leh man kan phut a. Thua zawhna a chhan kan duh a, tunah hian hlawh a la la reng a, chhiah chawitute sum a la chen reng a ni,” tiin mi dang pakhatin a sawi bawk.
Nairobi boruak hi a la tang hle a, khawpui lailia sumdawnna hmunte chu an inkhar a, khawlaiah mi pawh an tlem hle.