Mark Zuckerber leh Elon Musk ten cage fight inchona an ti mai mai lo

Ultimate Fighting Championship (UFC) preisdent Dana White chuan khawve pahausa pahnih, Elon Musk leh Mark Zuckerberg ten octagon ring chhunga inbeih an inchona chungchanga an pahnih hian a be ve ve tawh ni a sawiin, “An ti mai mai lo,” a ti a, heng billionaire pahnih te hi an inhmchhawn a nih ngat chuan khawvela boxing entu ngah bera an chhal 2017-a Floyd Mayweather leh Conor McGregor te inbeihna ai pawha entu an tam zawk a rin thu a sawi. Mayweather leh McGregor te inbeihna kha US-ah ringawt pawh mi maktaduai 50 chuangin an en a ni.
Tesla leh Twitter hotupa, khawvela hausa ber ni mek Elon Musk leh Meta hotupa, Facebook siam chhuaktu Mark Zuckerberg te hi social media lamah an inchophur viau mai a. Muck, kum 51, hian a social media platform, Twitter-ah Zuckerberg, kum 39, nena UFC ring chhunga inhmachhawn a inpeih thu a puang, he chona hi Zuckerberg pawhin Instagram-ah chhang letin, Musk-a’n a chona screenshot post-in, “A hmun tur rawn sawi rawh,” tiin he chona hi a pawm thu a puang ve nghal a, Musk hian “Vegas Octagon” tiin UFC Championship atana an hman thin chu a thlang tih a puang ve leh nghal bawk a ni.
Musk hian fiamthuin, “Move bon deuh mai ka nei a, ‘The Walrus’ ka ti mai a, ka hmachhawn te chungah engmah ti lovin ka bawk vel mai mai thin,” a ti a, “Ka work out ve ngai lo, ka tih ve chhun chu ka fate pawm a boruaka vawrh kanga ka lo dawn leh hi a ni mai,” tiin a tweet bawk.
Zuckerberg erawh hetiang inmal beih ralah chuan a duai vak dawn lo, thla kalta mai khan a vawi khat nan jiu-jitsu tournament-ah telin gold leh silver medal a dawng thei tlat. Zuckerberg hi Redwood City, California jiu-jitsu team-ah telin, anni hi a inzirna an ni nghe nghe a, an inhmachhawn a nih chuan Zuckerberg hi a chan a tha deuh zawk maithei a ni!