Boeing company-in CSR pe dawn

Boeing company-in CSR pe dawn
Boeing Company chuan Mizoram hnenah corporate social responsibility (CSR) a pe dawn a. Nilaini khan chief minister Lalduhoma kaihhruaiin Boeing Foundation hotute leh Mizoram sawrkar aiawhten a hman dan tur an sawiho.
Boeing India chief of staff & CSR head Praveena Yagnambhat chuan India ramah civil aviation leh defence sector-ah hma an la a. Hnathawktu 6000 chuang an nei a, CSR hmangin hmalakna tam tak kalpuiin, Mizoram tan pawh Covid len lai khan Aizawl, Lunglei leh Siaha a hospital-ah an thawhpui – Doctors for You kaltlangin hmanrua an rawn pe tih a sawi.
Mizoramah hriselna lamah leh zirna lamah hmalakna zau zawk neih an duh a, an kal dan rawn sawifiah pahin hmalakna tur an rawn ngaihven tih a sawi a ni.
Thutkhawmah hian cancer zai ngaite zaitu tur doctor thiam bik, a thlawna Aizawla rawn tirh dan tur, ZMC-a ICU hmanraw tha leh tunlai ber ber dah belh dan tur an sawi a. A tul anga Cancer Hospital leh ZMC hmunhma tlawh hoa bawhzui nise, an ti.
Zirna lamah Boeing Company hian Learning Links Foundation nen an thawk dun a. Education department-in Tinkering Labs an kalpui mek tihchangtlun thu, Mizoram zirna in thenkhata Sukanya STEM labs bun dan tur leh hmalak theihna remchang dang an sawi a ni.