Duhsak zawngte banah chauh an kai – Dr Lalmalsawma

Duhsak zawngte banah chauh an kai
– Dr Lalmalsawma
Sawrkarin Bana Kaih policy a kalpui mek chuan mipui a thleng phak loa, an duhsak zawngte banah chauh an kai tih Congress hruaitu Dr Lalmalsawma Nghaka chuan a sawi.
Aizawl South II MPCC hruaitute intawhkhawm Ningania neih a hmanpuinaah Congress treasurer Dr Lalmalsawma chuan, mipui nawlpui ban phak lohin ZPM sawrkarin a ban a pharsan ta emaw tih mai turin an awm a, mi nawlpui banah an kai ang tih an hlau niawm fahranin thlai thar an lei dan turah hand holding loan pek dan turah thil a harsa zawngin an ti thiam a, hetiang a nih mek lai hian party-a an hotu rualte chu nihna pawimawh pe in, dinhmun tha leh hlawh sang zawk an neih theihnan an banah an kai thung tih a sawi.
Restricted tender maksak kalpuiin, work supervisor tih hming chawi tirin an mi duhsak zawngte contract leh supply hmangin an dinhmun an siam len sak thur thur tih MPCC hruaitu hian a sawi a. Mipui hnenah CM Special Package an tawktarh a, a kalphung hian mipui thleng phak loin, an duhsak zawng mi tlemte tan siamin, inthlan apiangin vote zawnna atan ber an hmang niin a sawi.
“Rulh ngai lo loan, tiin an campaign mek a. Mah se, he CM Special Package an tih dawng tur hi an mi duhsak zawng mitlemte te tan niin a lang lehzel a ni,” a ti.
Thalaite tana bana kaih loan an sawi chu sawrkar laipui scheme awmsa – PMEGP, CGTMSE leh a dangte an rinchhan a, bana kaih loan hian kalphung a nei lo tih Dr Lalmalsawma hian a sawi a. Mimal anga mahnia dil theih thil a ni tih a sawi.
Tunlaiin sawrkar hnathawk an vau an ni mek tih a sawi bawk. “Chief minister-in sawrkar hnathawk chhawrtlak lohte ban mai tha an tih thu a sawi hi a dikna chen a awm a, zirchian ngai tak thil a ni. Sawrkar hnathawk ban an tum a nih chuan, mipui tana tangkaina awm lo, ram tana an hnathawh hriat tur awm lo adviser to CM, consultant, Board chairman leh OSD ho hi ban hmasa phawt se, an ni enkawlnan hian mipui sum tam tak senral a ni,” a ti.
A duhsak mite hum ran tum a, sawrkar hnathawkte tlin lohna leh fel lohna zawng reng renga an hmanhlel a pawi a tih thu MPCC treasurer hian sawiin, anmahni atanga bul an tan a ngai tih a sawi.