Boko Haram-ten Nigerian khaw pahnihah mi 20 vel that

Boko Haram firfiak ni ngeia hriat, motorbike-a chuangte chuan Nigeria hmarchhak khaw pahnih an beihnaah mi 20 vel an thi niin tual chhung thuneituin a sawi.
Boko Haram leh an zawmpui, Islamic State peng, ISWAP hian beihpui an thlak nasa hle a. Nigeria hmarchhaka hel tamna hmunah hian sipai hmunpui leh khaw hrang hrangte beihin an che nasa hle a ni.
Silai kengte hian Thawhlehni chawhnu khan Borno leh a thenawm, Adamawa state-a Pubagu leh Mayo-Ladde khuate chu an luhchhuah a, khaw veng tura inpete chu an awpbet hneh hle niin Askira-Uba district chairman Mada Saidu-a chuan a sawi.
Pubagu-ah mi 11 an thi a, Mayo-Ladde-ah mi pakua an thi bawk nia hriat a ni a. In leh dawr hal a ni a, ei tur awm ang ang pawh an laksak niin Saidu-a chuan a sawi.
Islamist firfiakte hian kum 17 chhung zet chu Nigeria hmarchhakah hian Islam ram sual chhuah tumin helna an lo kalpui tawh a. Mi sang telin thih phah tawhin mi maktaduai hnih vel tlanchhiat ngaiin an awm tawh niin tanpuitu pawlte chuan an sawi a. Anmahni hneh tumin sipaiten beihpui thlak thin mah se nuai chimih an la harsat rih a ni.