Bordeaux-a tlo lo Andy Murray

Grand Slam-a vawithum champion tawh Andy Murray chu Bordeaux khawpuia clay-court ATP Challenger tournament second round paltlang zo loin Gregoire Barrere lakah 6-4 6-2-in a tlawm.
Briton hian kumin March thla Miami Open-a a kheimit a tihnat hnua a vawikhatna’n France ramah tournament a khel a, first round-a a tumpui Kyrian Jacquet chu second set-ah hliam vanga a inhnuhdawh avangin first-round match a paltlang hram a, second round-ah tualchhung tlangval hneh loin a tlawm zui ta a ni.
Hliamin a tihbuai fo avanga world number 77-na ni duai tawh Murray-a hneh loh Barrere kha world number 115-na daih niin, kum 37 mi Scot kha rinkai zawk a ni lo thei lo a, mahse, hliam avanga a bawksawp fona chuan a la hnukhniam zel rih niin a lang.
Murray hian kumin nipui laia tournament hmachhawn tam a tum loh thu sawilawk mah se a tournament khelh hnuhnungber tur a la puang rih lo a, French Open hi a tinzawn phawt rin a ni.
Briton dang Dan Evans pawh Bordeaux tournament-ah hian chhuakin, Frenchman Harold Mayot laka 6-3 7-6 (7-3) hnehna nen quarter-final a lut bik a, semi-final luh inchuh match pakhatah Shang Juncheng of China a hmachhawn leh ang.