Zendaya channa, romance-tennis drama ‘Challengers’ chuan tun weekend kalta khan North America-ah cinema hall ticket hralhna atangin dollar maktaduai 15 lalutin, box office No.1 a ni. He film hi R-rated drama-ah chuan COVID-19 hripui len hnua opening weekend-a sum lalut tam ber dawttu niin ‘Don’t Worry Darling’ chiah a pha lo.
He film hian US pawn lamah, ram hrang hrang 52 atangin dollar maktaduai 9 lalut bawkin, tihian opening weekend a a lakluh chu dollar maktaduai 25 a tling ta a ni.
He film hi hmeichhe lamin an bawr deuh a, ticket leitu 58% chu hmeichhia an ni a, ticket leitu 76% chu kum 18 leh 34 inkar an ni bawk. He film-ah hian Zendaya bakah Mike Faist leh Josh O’Connor te pawh an chang a, tennis player leh a hmangaih pahnih ka inkar vel tarlanna a ni.
Film tlangzarh thar bawk ‘Unsung Hero’-in dollar maktaduai 7.8 lalutin No.2 a ni a, he film hi sakhaw rinna lam behchhan a ni a, dollar maktaduai 6 vel senga siam a ni. A film hi a tak taka thil thleng behchhan a ni a, David Smallbone te chungkua Australua atanga USA-a hmalam hun tha zawk beiseia pem, mahse, an music company a tlakchhiat tak dan te, chutiang kara a nupui nen an fate music talent neih that dan an hriatchhuah dan te tarlan a ni a, an fate zinga pathum chu an hlawhtling zui ta a, King + Country leh Rebecca St. James te an ni.
Godzilla x Kong leh Dune: Part Twi te pawh an la kaltluang viau a. Godzilla x Kong ian dollar maktaduai 7.2 lalut lehin No.3 a la ni a, he film hian North America-ah dollar maktaduai 181.7 lalut tawhin, kawvel huapin dollar maktaduai 519.3 a lalut tawh bawk. Dune pawhin US-ah dollar maktaduai 279.7 lalut tawhin, US pawna alakluh nen chuan dollar maktaduai 704.5 a tlin ve tawh bawk.
-- Advertisement --
Box office top 10:
1 Challengers $15,011,078
2 Unsung Hero $7,750,000
3 Godzilla x Kong: The New Empire $7,200,000
4 Civil War $7,004,038
5 Abigail $5,250,000
6 The Ministry of Ungentlemanly Warfare $3,860,000
7 Kung Fu Panda 4 $3,550,000
8 Ghostbusters: Frozen Empire $3,250,000
9 Dune: Part Two $1,985,000
10 Boy Kills World $1,600,000