Box Office-ah ‘Project Hail Mary’ a la No.1
Ryan Gosling channa, sci-fi epic ‘Project Hail Mary’ chuan tun weekend kalta khan North America-ah cinema hall ticket hralhna atangin dollar maktaduai 54.5 la lut lehin, box office No.1 a tum hnih nan box office No.1 a ni a, he film hian kar hnih chhungin North America-ah dollar maktaduai 164.3 a la lut tling ta a, US pawn ram hrang hrang atangin dollar maktaduai 136.2 a la lut taw bawk a, tihian ni 10 chhunga khawvel huapa a lak luh chu maktaduai 300.8 niin, kumina cinema hall ticket hralhna atanga sum la lut hnem ber a la ni.
Project Hail Mary-ah Gosling chu high school-a biology zirtirtu niin, vanthengrenga boruak lawngah a harh chhuak hlawl mai a, chutah chuan engtianga lo awm nge a nih a inngaihtuah chhuak thei lo, chu boruak lawnga chuang ve midang chu an thi vek tawh bawk si. Tichuan zawi zawiin chu boruak lawnga a awmna chan chu a hrechhuak hret hret a, ni (sun) chu chhan eng emaw avangin a thim dawn a, ni a thim chuan khawvel pawh a tawp a ni mai dawn a, chumi pumpelhna tura ni thim tur ven dan ngaihtuah tura awm a lo ni a, chutah cuan a tum ang tho tih lo tum ve alien a hmuchhuak a, chu nen chuan an thawk dun ta vel a ni.
Box office No.1 hlui ‘Hoppers’-in a weekend vawi linaah dollar maktaduai 12.2 la lut lehin No.2 a la ni a, he film hian US-ah dollar maktaduai 138.6 la lut tling tawhin, US pawna maktaduai 159 a lak luh nen chuan dollar maktaduai 297.6 a la lut tling tawh.
Film tlangzarh thar ‘They Will Kill You’-in maktaduai 5 la lutin No.3-ah a debut. He horror-comedy hi setana betu, New Yotk City a luxury building a cheng ten an hnathawktu te inthawi nana an thah thin dan vel te tarlanna a ni.
Bollywood movie ‘Dhurandhar: The Revenge”-in dollar maktaduai 4.74 la lut lehin No.2 atangin No.4-ah a tawlh, he film hian ni 10 chhungin US-ah dollar maktaduai 22.3 la lut tawhin, Indian film zinga US-a sum la lut hnem ber a la ni a, US pawna a lak luh te nen chuan dollar maktaduai 150 a tlin ve tawh bawk.
Box Office Top 10:
1 Project Hail Mary $54,537,595
2 Hoppers $12,200,000
3 They Will Kill You $5,000,000
4 Dhurandhar: The Revenge $4,745,000
5 Reminders of Him $4,700,000
6 Ready or Not 2: Here I Come $4,000,000
7 Scream 7 $2,600,000
8 GOAT $2,200,000
9 undertone $1,651,762
10 Forbidden Fruits $1,170,000