Buaina tuar Zofate Manipur sawrkarin zangnadawmna pe rawh se – BJP Mizoram

Buaina tuar Zofate Manipur sawrkarin
zangnadawmna pe rawh se – BJP Mizoram
Manipur-a buaina avanga Zohnahthlakte tawrhna hrang hrangah Manipur sawrkar chu a tuartute hnenah zangnadawmna pe turin an phut tih BJP Mizoram chuan an sawi.
BJP Mizoram State office bearers thuchhuak chuan, Manipur-a chi leh chi intih buaina avanga Zohnahthlak thi leh hliam, an in halsak leh thiahsak takte chu an tawrhpui takzet a. Manipur sawrkarin zangnadawmna tha tawk pein leh chenna in leh eizawnna hmun tihchhiat sak zawng zawngte chu a tharin din sak leh turin an phut tih a sawi.
He intihbuainaa sakhaw biak in pawh zahpah loa tam tak tihchhiat leh hal a ni chu an dem takzet tih sawiin, biak in sak thatna tur leh siamthatna tur pawh Manipur sawrkarin ngaihtuahsak turin an phut tih a sawi bawk.
He buaina avanga mipui tawrhna nasa zawk a thlen hmaa PM Narendra Modi leh Home minister Amit Shah te’n India Constitution Article 355-na tlawhchhana hmanhmawh taka Rapid Action Force tirluta buaina sosang zel tur an hmetmit thuai chu lawmawm an tih thu BJP Mizoram OB hian sawiin, ‘Manipur-a chi leh chi inkar buaina avanga Zohnahthlakten nasa taka an tuar hi pawi kan ti takzet a, in leh lo chante pawhin anmahni chenna hmunah ngei in thar neia thlamuang taka an awm zui theihna’n puih an ngaihna apiangah a tawp thlenga pui turin BJP Mizoram chu kan awm reng a ni,’ a ti.
Buaina a chhuah tantirh atangin Central YMA hruaituten Mizoram sawrkar hotute finchhuah a, party hruaitu leh NGO hruaitute nen Manipur-a Mizoram mi tangkhangte hruaihaw kawngah leh Zofa raltlante buaipui kawngah pa chan changa hma an la chu lawmawm a tih thu a sawi a. ‘BJP Mizoram chuan hnam issue leh ramri issue-ah pawh nasa takin hma kan lo la tawh thin a. Ram leh hnam issue ah chuan party bil sawiloa tanrual zel hi party zawng zawngin kan tih turah kan ngai a. BJP huphurhna avanga party thenkhatin dawt hmanga mipui hmaa BJP an bei fo hi sim tawh turin kan chah a ni,’ a ti.
BJP Mizoram awm chhan leh din chhan chu Mizoram leh hnam a him a, mahni kea ding thei tur khawpa Mizoram buatsaih a ni, tiin, hemi atan hian miretheiten leirem kan raha kan chanvo dik tak kan chan theihna tur leh, Zofate inpui, Mizoram chu hnam inlungrual tak kan nih avangin, state dang entawntlak tur khawpa central puihnaa development thlentir chu an tum a ni tih a sawi a ni.