Building Regulation kan ennawn dawn – Lalnghinglova Hmar

AMC-ah ZPM a sawrkar chuan Building Regulation an ennawn dawn tih ZPM hruaitu Lalnghinglova Hmar chuan a sawi.
Thawhlehnia an party tana street campaign neihah ZPM hruaitu hian, AMC-ah ZPM an sawrkar chuan Building Regulation an ennawn anga, building permission nei tura hun tam tak sen ngai thin chuan Aizawl mipui tam tak harsatna a siam tih a sawi. A bikin building loan la ten harsatna an tawk nasa tih sawiin, rang zawka permission neih theihnan Building Regulation an ennawn dawn tih a sawi a ni.
Lei laih chungchangah kalphung mumal zawk neih theihnan ennawn tha an tih bakah ran vulh khapana dan pawh siamthat an tum tih a sawi. “A bikin vawk vulh hi mi harsa zawkte eizawnna a ni a, veng thenkhatah chuan kalpui theih loh mah se, a theihna vengah chuan khapna dan hi local council-te nena inrawn tawnin ran vulh theihna dan kan siam dawn,” a ti.
Thusawitu dang, ZPM Thalai president Jeje Lalpekhlua chuan, ZPM sawrkar hnuaiah Mizoram thalaite thla a muang a, sawrkar hna lakah pawh advertisement telloa state sawrkar hnuaia hna lak a awm lo tih a sawi.
ZPM Thalai-in AMC hnuaia advertisement kaltlang loa hna lak a awm tih an hriat chu an bawhzui mek a, AMC corporator fate pawh an la nia sawiin, heng hnathawk mekte pawh hi an lo inhnukdawk lo a nih chuan ZPM Thalai chuan an umzui zel dawn tih a sawi a ni.