Cake hmanga siam kawr lian ber

Switzerland-a cake ur thiam Natasha Coline Kim Fah Lee Fokas chuan mo kawr ang deuhin, cake hmangin kawr fual a siam a, a cake siam hi a hak theih a, a ei theih bawk a, cake hmanga kawr lian ber record a siam.

He cake kawrfual hi kg 131.15 a rit niin, January ni 15, 2023 khan Bern, Switzerland-a Swiss World Wedding fair-ah a phochhuak a, he fair tlawhtu thenkhat chuan a cake hi an ei ve nghe nghe a ni.

Natasha hi chhang urna SweetyCakes neitu a ni a, cake danglam deuh bik siam lama mithiam an ni. He cake hi hak theih, ei theih tho bawk, cake kawr lian ber record siam tum hrim hrimin a ur a ni a, a tum ang ngeiin record a siam ta a ni.

Cake hnuailam thenkhat-ah hian aluminium frame an hmang a, a chunglam hi chu chini chawh kawi (sugar paste) leh fondant hmanga siam a ni ve thung. Kawr hatu hi a kal kual velnaah cake a chhiat mai loh nan a cake rihna a insem zai theih nan a kawr hnuaiah a ke lir thei pahnih an dah tel bawk a ni.

Guinness guidelines-ah chuan record siam thei turin cake hi a lo berah kg 68 tal a nih a ngai a, model-in an ha thei ngei tur a ni a, ha chungin meter 5 (feet 16) a thui tal an kalpui thei tur ani a, a cake chu a ei theih ngei bawk tur a ni.