Car chesualah pahnih thi

September 4 zan dar 7.00 vela Siaha bul Tisopi penga lirthei chesualah mi pahnih an thi a, pakhat a hliam.
Thudawn danin Thawhtanni tlaia car-a lengchhuak mi pathum chu an haw loh avangin an chhungten an zawng a, an awmna chin an hriat theih mai loh avangin Thawhlehni khan khawtlang an pun a ni. Khawtlang hian an phek zawn a, heng mite awmna veng Siahatla chhak lawkah lirthei tlanliamna hnu niawm tak an hmuh atangin, an chhui thla a, an chesual tih hi hriat a ni ta a ni. An hmuh hun hi Thawhlehni chawhnu dar 3.30 vel a ni.
Mi chuang pathum zinga pahnih – car neitu leh a khalhtu E. Vanlalchhuana (52) s/o Khuperha (L), Siahatla leh FC Lalhnehpuia (46) s/o F Haichema (L) Siahatla te chu a hmunah hian an lo thifel tawh a. N.Iatha (45) s/o N Laihia (L) Siahatla chu damin an hmu a, car lum hian a chhak deuhah a sawhchhuak. Siaha District Hospital-ah dahluh nghal niin, a dinhmun hlauhthawnawm a ni lo nia ngaih a ni.
Thudawnna sawi danin, car neitu hian a leithar a ni a, khalh a la thiam chiang lutuk lo nia sawi a ni. An chetsualna pawh hi kawng zau lai nia sawi ni bawk. Car hi kawngpui atangin a thlang metre 500 velah a lo awm a ni.