Damdawi ina tharum thawh zawnga luhchilha puh man

Damdawi ina tharum thawh
zawnga luhchilha puh man
Damdawi ina damlo dang awmna zinga mi luhchhuaha tharum thawh leh bengchheng siam zawka chea puh mi pali chu police-in manin hren an ni.
Thudawn danin, January 31 zan khan Adventist Hospital Seventhday Tlang Chawnpuiah damlo pakhat leh amah awmpuitu chu mi thenkhatin luhchilhin an vau bakah pakhat hi kut thlak a ni a. Damlo dang awmte ti phawklek zawngin an che nia sawi a ni.
He thil hi hemi zana hmundanga tute emaw intihbuaina kaihhnawih nia hriat a ni a. Bawngkawn Police Station pawh kut tuartu nia sawi lam hian thubuai thehluh tumin an bel a ni. Kut tuartu nia sawi thenrualte leh kut thlaktu zinga tel nia sawi, Adventist Hospital-a lut zui ta te hi inbakkaih zui zelin, a hmaa kut tuartu nia sawi thenrualte hi damdawi in chhungah tharum thawh leh bengchheng siam zawngin an che ta chiam mai nia sawi a ni.
He thilah hian damdawi in thuneitute hian police station-ah FIR thehlutin, damdawi in chhunga tharum thawh zawnga chetnaa inhnamhnawih leh meizang hlaptu nia hriat mi pali – Roderick Thangdingliana Renthlei (32) Zonuam Veng; Lalduhawma Khawlhring (38) Kanan Veng; Lalsangzuala Ralte (33) Luangmual leh Abenego Lalrinawma (31) Chhinga Veng te chu police station-ah hian koh niin, thu zawhfiah atana kawl rih tumin medical test neihpui an nih hnu ah police hian kawl a, vawiin – February 3 hian court-ah inlan tura kalpui an ni dawn a, an chungthu hi ngaihtuah zui a ni dawn tih thu dawn a ni.