Central Team-in chhiatna thlenna hmun enfiah mek

Cyclone Remal vanga tunhnaia Mizorama chhiatna thlen dan enfiah tur Central Team chu Zirtawpni khan an rawn thleng a. Sairang, Sairang Dinthar leh Sihhmui a tui lian vang a chhiatna hrang hrang an en nghal.
Chhinchhiah danin, kumin May 28-a thlipui leh ruah thawk avang khan Sairangah tuilianin chenna in 28 a chim a, in dinglai 10 a khawih chhe tel bawk. Heng zingah hian zirna in, Mosque leh Mandir a tel a ni. Sihhmuiah tuilian hian lawngleng 12 a la bo a, balu lakna kawng tichhiain Tlawng kama nul siam thahnem tak a tichhia a ni. Sairang Dintharah chenna in 12 leh zirna in 1 tuilian vang hian a chhia.
Sawrkar laipuiin a ruat ‘Inter-Ministerial Central Team’ member hi Ministry of Road Transport & Highways regional officer Adelbert Susngi, Ministry of Jal Shakti SE Rajeev Singh, Rural Development assistant commissioner Moti Ram an ni a. Vawiin – June 22 hian an rawn thlen belh ang. June 25 thleng an cham anga; an cham chhung hian Greater Aizawl Water Supply Scheme Phase I & II, Melthum/Hlimen leimin, Kulikawn leh ITI Veng thlanmual min, ZMC Falkawna lei che vanga building hlauhawm lai, Aizawl- Aibawk -Darlung inkar kawng, Durtlang leh Kanan Veng thlanmual bakah Serchhip Zawlpui Zau an tlawh dawn a ni.
Zirtawpni tlai khan Central Team hi PHE minister Prof Lalnilawma chuan a a kawm a. Cyclone Remal avanga Mizoram hmun hrang hranga chhiatna thleng hrilhfiahin, a bikin a department chan – PHE, Horticulture leh RD kaihhnawiha harsatna thleng a sawipui.
Greater Aizawl Water Supply Phase-I a chhiat vek thu leh a khawl thawmthat tura thawnchhuah a nih thu a sawi a. Tui thianghlim mamawh ang pump theih loh vanga Aizawl mipuiin harsatna an tawh thu sawiin, an thil hmuh behchhan anga Mizoram mamawh sawrkar laipui hnena a thehluh pawh a theih anga chaka lo enzui sak an mamawh tih a hrilh a ni.