January 21, Inrinni zan khan English Premier League khelh chhunzawm niin, inkhel paruk a awm a. Inkhel ngaihven hlawh berah Liverpool leh an mikhual Chelsea te chu goal awm lovin an inhnehtawk. Inkhel dangah Newcastle United in Crystal Palace hneh zo bik lo mahse, EPL ah tlawm nei lova kaltluang zel in, club record thar an siam tho thung. Inrinni zanah West Ham hneh lova Everton an tlawm leh tak vangin manager Frank Lampard dinhmun a derthawng leh zual. Hetihlai hian Everton an hneh vangin Hammers manager David Moyes chuan ban a pumpelh rih thung.
-- Advertisement --
Reds 0-0 Blues
EPL season kal meka beisei phak lo team lian pahnih; Liverpool leh Chelsea te chu chak mamawh tak chungin Anfield ah an inhmachhawn a. Goal thun tumin innawr viau thin mahse hun tawp thlengin goal thun thei an awm lo va, goal awm lovin an inhnehtawk. Jurgen Klopp-a’n manager anga inkhel vawi 1000 a hmachhawn tlinna inkhelah Chelsea nen an inhnehtawk hi Liverpool tan result lawmawm lo a ni zawk ngei ang.
Anfield a lenglut Chelsea hian Kai Havertz hmangin goal an thun thuai a. VAR rawn a nih hnuin Havertz goal thun hi hnawl a ni thung. Chelsea tan hian Silva, Ziyech leh an player thar Mykhailo Mud-ryk ten goal thun theihna hun tha nei bawk mahse an chhawr tangkai zo lo vek. Blues manager Graham Potter chuan manto taka an lak luh Mykhailo Mudryk chu second half ah a luhtir a. Ukranian winger hi a club tar tan mit la takin inlan nghal mahse EPL ah goal thun nghal theihna hun tha a neih chu uiawm takin a hlah thung. Liverpool lakah goal thun nghal lo mahse Mudryk hi player hlauhawm tak a ni zui ngei dawn tih erawh a rin theih thung.
Mualneitu Liverpool hi goal thun theihna hun tha nei tlem zawkah an tang a. Half chance an neih that ber chu Cody Gakpo-a’n uiawm takin a hlah a. Defender Alexander Arnold pawhin a hun tha neih a hlah ve bawk. Hun tawp thlenga goal thun thei an awm loh vangin chak mamawh em em Lliverpool leh Chelsea te chu goal awm lovin an inhnehtawk zui ta a ni.
Liverpool leh Chelsea te hian point 29 ve ve an hmu mek a. Palinaa awm mek Manchester United chu point 10 zetin an phak lo dun mek. An tan champion beisei ngam a ni tawh lova, champions league khel phak tur pawhin hma sawn a, insiamthat thuai an mamawh.
Newcastle record thar
Season kal meka khel tha tak Newcastle United chuan inrinni zan khan Selhurst Park-ah Crsytal Palace an hma-chhawn a, London club nen hian goal awm lovin an inhnehtawk. Mimualah chak zo lo mahse Newcastle United hi khelh 15 chhung tlawm nei lovin an kaltluang ta chiah. Hei hi top-flight game ah tlawm nei lova an kaltluan rei ber tum a ni a, club record thar an siam tho thung.
Inrinni zana inkhel dangah West Ham United chuan an mikhual Everton chu si hnih faiin an hneh. Everton an hneh vangin West Ham manager David Moyes chuan ban a pumpelh a, a him rih phawt. Hetihlai hian Everton manager Frank Lampard dinhmun erawh a derthawng ta viau thung.
Chak mamawh West Ham tan hian Jarrod Bowen chuan minute 34 naah hmahruaina goal a thun a. Amah vek hian minute 41 naah an goal hnihna a thun zui leh bawk a, a goal hnih thunte hi an chakpui a, point thum hlu tak an hmu.