Meobourne Park ah Austrlian Open 2023 khelh chhunzawm zel a ni a. Inrinni tlaia third round khelhah hliamin a tihbuai Novak Djokovic chuan hliam tur chunga a hmachhawn Grigor Dimitrov chu set hloh lovin a hneh. Djokovic a chak lai hian World No. 1 hlui Andy Murray chu Roberto Bautista Agut lakah a tlawm thung.
Australian Open ah vawikua lai champion tawh Novak Djokovic hi mal hliamin a tibuai a, Australian Open 2023 tan phat atangin hliam tuar chungin a inlan. Hliam tuar chunga inlan a nih vangin a that dan berin a inlan thei lova, a che vel a hmuhnawm tawk lo. Beisei angin khel tha thei lo mahse Djokovic hian hnehna a chang chho zel thung a, tualchhung tlangval Alex de Minaur hmachhawn turin fourth round a lut.
-- Advertisement --
Third round ah Novak Djokovic leh Grigor Dimitrov ten inkhel hmuhnawm an lantir a, set khatnaah an inhnehtawk hle. Set khatnaah hian tie-break khelh a ngai nghal pang. Tie-break ah tawnhriat ngah zawk Djokovic a chungnung zawk a, set khatna a la. Set hnihnaah Djokovic a khel tha ta viau a, game thum chauh lo chungin set a la zui leh a. Set hnih a lak zawn hnuin break pawimawh tak a neih chhawr tangkaiin Djokovic hian set ala zui leh a, 7-6 (9-7) 6-3 6-4 a chakin fourth round a lut.
Set hloh lova Dimitrov paltlangtu Djokovic hian third round ah Benjamin Bonzi hnehtu Alex de Minaur a hmachhawn zui leh ang. Tualchhung tlangval Minaur hian tantu a nei tha viau dawn a. Fourth round ah Djokovic hi chak tura rinkai zawk ni mahse hliam vanga a inlan tluan theih loh hun a thleng nge nge tih erawh a hlauhawm viau thung.
Australian Open ah vawi 9 zet champion tawh Djokovic a chak lai hian Grand Slam a vawinga champion tawh Andy Murray erawh chu fourth round lut zo lovin a tla thung. World No. 1 hlui Murray hian Roberto Bautista Agut a hmachhawn a. Third round ah set khat la ve bawk mahse, 6-1 6-7 (7-9) 6-3 6-4 in tlawm zawkah a tang tho thung. Murray rual hian British innghahna pakhat Dan Evans pawh Andrey Rublev lakah a tlawm ve bawk a. Fifth seed Andrey Rublev hian Evans hi 6-4 6-2 6-3 a hnehin fourth round a lut